Тожикистон терма жамоаси ва «Сўғдиёна» жамоаси ҳимоячиси Зоир Жўрабоев яқин вақтларда Европага йўл олиши мумкин. Goal.tj хабар беришича, 27 ёшли футболчига Германиянинг Иккинчи Бундеслига клуби — «Холштайн Киль» томонидан расмий таклиф келиб тушган.
Манбага кўра, ҳозирда томонлар ўртасида музокаралар фаол давом этмоқда. Футболчининг агентлари ва немис клуби шартнома шартларини муҳокама қилмоқда. Агар келишув амалга ошса, Жўрабоев «2+1» тизимидаги шартномани имзолайди — икки йиллик асосий келишув ва бир йиллик узайтириш имконияти билан.
Шартнома 2026 йилнинг бошида кучга кириши кутилмоқда. Бу вақтга қадар футболчи «Сўғдиёна» билан мавсумни якунлаб, кейин Германияга йўл олади.
Маълумот учун, Зоир Жўрабоев жорий мавсумда «Сўғдиёна» сафида муҳим ўрин тутиб, жамоа ҳимоясининг етакчи фигураларидан бирига айланди. У нафақат маҳаллий чемпионатда, балки халқаро учрашувларда ҳам ўз барқарор ўйини билан ажралиб турди.
Немис ОАВ ёзишича, «Холштайн» клуби қишки трансфер ойнасида ҳимоя чизиғини мустаҳкамлашни режалаштирмоқда ва Жўрабоев бу режадаги устувор номзодлардан бири ҳисобланади.
Тожикистонлик ҳимоячининг Европага йўл олиши унинг фаолиятида янги босқични бошлаши мумкин. Маҳаллий экспертлар фикрича, бу трансфер нафақат футболчининг шахсий карьераси учун, балки минтақавий футбол учун ҳам муҳим сигнал ҳисобланади — Марказий Осиё футболчиларига Европа эшиклари тобора кенгаймоқда.
«Сўғдиёна» клуби билан амалдаги битим мавсум охирида тугайди. Агар келишув расмийлашса, Жўрабоев янги йилдан Германиядаги янги жамоаси сафида фаолият бошлайди.
“Zamin”ни Telegram'да ўқинг!
