Испания терма жамоаси ва “Барселона”нинг энг ёш юлдузларидан бири Ламин Ямаль мухлислар орасида шов-шувга сабаб бўлган қарор қабул қилди. Энди у одатдагидек имзо тарқатишни тўхтатди ва фақат махсус тижорат платформаси орқали ўз дастхатини сотишни режалаштирмоқда. Бу ҳақда Mundo Deportivo нашри маълум қилди.
Манбалар хабарига кўра, Ямальнинг реклама ва маркетинг фаолиятини бошқарувчи агентлик унга янги тижорат стратегиясини таклиф этган. Спортчиларнинг имзоланган кийимлари, бутсилари ва бошқа атрибутларини сотиш билан шуғулланувчи компания футболчига расмий шартнома таклиф қилган.
Шу сабабли, Ямаль ҳозирча мухлислар олдида имзо беришни тўхтатган, бироқ улар билан суратга тушишни давом эттирмоқда. “Барселона” клуби бу қарорни табиий ҳол сифатида қабул қилган ва бу орқали футболчининг бренд қиймати янада ошиши мумкинлигини қайд этган.
Клуб расмийларининг таъкидлашича, ҳозирда Ямаль жамоа доирасида маълум миқдордаги имзолар учун рухсат бериш бўйича музокаралар олиб бормоқда. Унинг имзоси бозорда жуда кам экани боис, бу нарса коллекционерлар учун янада қимматли бўлиб бормоқда.
Шартнома ҳали расман имзоланмаган бўлса-да, икки томон ҳам келишувни якунлаш ниятида эканлиги маълум қилинган. Бундай маркетинг усули АҚШда, айниқса NBA юлдузлари орасида анча кенг тарқалган бўлиб, спортчилар имзоларини ва шахсий брендларини моддий қийматга айлантиради.
“Барселона” раҳбарияти Ямалнинг қарорини қўллаб-қувватламоқда ва уни клуб академиясининг фахри сифатида кўради. Улар ёш футболчининг катта салоҳиятини, бозордаги тижорий қийматини ва имиджини сақлаш муҳим эканини таъкидлашган.
Маълумот учун, Ламин Ямаль бугунги кунда Adidas, Beats, Powerade, Oppo, Konami ва Nesquik каби йирик халқаро брендларнинг расмий вакили саналади. Шунингдек, у UNICEF элчиси ҳам ҳисобланади.
Мухлислар учун бу қарор бир оз ғалати туюлса-да, мутахассислар фикрича, бу замонавий спорт индустриясида табиий йўналиш — юлдузлар нафақат майдонда, балки бозорда ҳам ўз брендини бошқаришни ўрганмоқда.
“Zamin”ни Telegram'да ўқинг!
