Португалия чемпионати сўнгги йилларда ёш истеъдодлар фабрикасига айланиб улгурди. Ушбу мусобақада ўз номини тез суръатда танитган футболчилардан бири — “Фамаликан” клуби ярим ҳимоячиси Гуштаву Са бўлди, деб ёзди Calciomercato.
Манбанинг маълум қилишича, 20 ёшли португал футболчига ҳозирнинг ўзида Европанинг икки етакчи клуби — “Манчестер Сити” ва “Ювентус” жиддий қизиқиш билдирмоқда. Ҳар икки жамоа унинг ўйин услуби ва универсал қобилиятини юқори баҳолаган.
Гуштаву Са футбол сирларини “Порту” академиясида ўрганган ва кейинчалик “Фамаликан” ёшлар тизимига қўшилган. 2022 йилдан буён асосий жамоа сафида мунтазам ўйнаб келаётган ярим ҳимоячи жамоа марказида, айниқса ҳужумчи ортида фаол ҳаракат қилиши билан танилган.
Футболчи билан амалдаги шартнома 2029 йилнинг 30 июнига қадар мўлжалланган. Transfermarkt маълумотларига кўра, унинг бозор қиймати 16 миллион еврога баҳоланган. Аммо “Фамаликан” раҳбарияти унинг келажаги порлоқ эканини яхши билгани учун шошилмаяпти.
Гуштаву Са техник жиҳатдан етук, паслар аниқлиги ва майдонни кўра билиш қобилияти билан ажралиб туради. Мутахассислар фикрича, у замонавий ярим ҳимоячи учун керакли барча фазилатларга эга.
Тахминларга кўра, қишки трансфер ойнасида “Сити” ва “Ювентус” ўртасида унинг учун жиддий тортишув бўлиши мумкин. Гвардиола уни келажакда “Сити”нинг марказий бўғинидаги муҳим фигура сифатида кўрса, италияликлар эса уни келажакдаги “Погба” сифатида баҳоламоқда.
Шундай қилиб, Португалия футболи яна бир ёш юлдузни дунёга танитаётган кўриниши бор — Гуштаву Са яқин йилларда Европадаги энг қизиқарли трансферлардан бирига айланиши мумкин.
“Zamin”ни Telegram'да ўқинг!
