"Бенфика" бош мураббийи Жозе Моуриньо Англиянинг "Нюкасл" клуби билан ўйин олдидан журналистлар билан суҳбатлашди. УЕФА Чемпионлар лигаси умумий босқичининг учинчи тури доирасидаги учрашув бугун, 21 октябрь куни кечқурун бўлиб ўтади. Бу ҳақда Euro-football.ru хабар берди.
Моуриньо ўз нутқида Нюкасл шаҳри ва клубига бўлган илиқ муносабатини таъкидлади. У олти йил давомида сэр Бобби Робсон билан бирга ишлаганини эслади. Моуриньо Робсон ҳар куни "Нюкасл"га, унинг ҳудуди ва футбол жамоасига бўлган меҳрини намоён қилганини айтди.
Шунингдек, у бу инсоннинг таъсири туфайли "Нюкасл" унга жуда қадрли эканини билдирди. Моуриньо футболчиларига Нюкаслда ўйин муҳитини ҳис қилишлари ҳақида гапирди.
У "Нюкасл" кучли жамоа эканини таъкидлади. Мураббий баъзилар клубнинг лигадаги ҳозирги ўрни сабабли янглиш фикрга боришлари мумкинлигини айтди, бироқ бу клуб ҳар доим юқори савияда ўйнашини қайд этди.
Жозе Моуриньо "Нюкасл"ни бошқариш истаги бор-йўқлиги ҳақидаги саволга ҳам жавоб берди. У ҳозир клубга янги мураббий керак эмаслигини, мавжуд бош мураббий Эдди Хоунинг ишлари яхши кетаётганини қайд этди.
Моуриньо келгусида ҳам клуб ва мураббий учун муваффақият тилади. Аввалроқ "Нюкасл" бош мураббийи Эдди Хоу ҳам бўлажак ўйин ҳақидаги фикрлари билан ўртоқлашганди.
