Мадриднинг “Реал” клубида яна катта ўзгаришлар бўлиши мумкин. Испания матбуоти тарқатган маълумотларга кўра, “қироллик клуби” президенти Флорентино Перес португалиялик машҳур мураббий Жозе Моуриньо билан махсус учрашув ўтказган.
Mundo Deportivo нашри хабарига кўра, музокара видеоконференция шаклида бўлиб ўтган ва тахминан бир соат давом этган. Суҳбатда Жозе Моуриньонинг агенти ҳам қатнашган, аммо у фақат кузатувчи сифатида иштирок этгани айтилмоқда.
Манба маълумотига кўра, учрашувда асосий мавзулардан бири — португалиялик мутахассиснинг “Реал”га эҳтимолий қайтиши бўлган. Қайд этилишича, Моуриньо Мадрид клубига қайтиш эҳтимолини рад этмаган, бироқ ҳозирча аниқ розилик ҳам бермаган.
Хабарларда айтилишича, Жозе Моуриньо раҳбарият олдига бир қатор шартларни қўйган. Эътиборлиси, бу талаблар молиявий жиҳатлар билан боғлиқ эмас. Португалиялик мураббий жамоанинг спорт тизими, тиббий штаб, ташкилий ишлар ва интизом масалалари бўйича ўз қарашларини билдирган.
Флорентино Перес эса ушбу шартлар юзасидан келаси ҳафтада якуний жавоб бериши мумкинлиги айтилмоқда.
Жозе Моуриньо “Реал” тарихида ўзига хос из қолдирган мураббийлардан бири ҳисобланади. У 2010 йилдан 2013 йилгача Мадрид клубини бошқарган ва ўша даврда жамоа билан Испания чемпионлиги, мамлакат кубоги ҳамда Суперкубогини қўлга киритган.
Айниқса, унинг “Барселона”га қарши принципиал баҳслардаги курашчан услуби ва жамоага олиб кирган ғалаба руҳи мухлислар томонидан ҳалигача илиқ эслаб келинади.
Футбол таҳлилчилари фикрича, агар Моуриньо яна “Реал”га қайтса, бу Европа футболидаги энг шов-шувли воқеалардан бирига айланиши мумкин. Чунки португалиялик мутахассис ҳар доим кучли характер, қатъий интизом ва катта босим остида натижа қилиш қобилияти билан ажралиб турган.
Айни пайтда мадридлик мухлислар ушбу хабарларни катта қизиқиш билан кузатмоқда. Кўпчилик Жозе Моуриньонинг эҳтимолий қайтиши клубда янги давр бошланишига сабаб бўлиши мумкинлигини таъкидламоқда.
“Zamin”ни Telegram'да ўқинг!
