Ўзбекистон кубоги финали олдидан ўтказилган анъанавий матбуот анжуманида “Бухоро” жамоаси бош мураббийи Александр Хомяков ва жамоа етакчиси Азизбек Амонов журналистлар саволларига жавоб берди. Уларнинг сўзларидан маълум бўлишича, жамоа ғалаба учун жиддий тайёргарлик кўрмоқда ва финалда мухлисларини қувонтириш ниятида.
“Биз финалга фақат ғалаба нияти билан чиқамиз. Мухлислар учун бу ўйин қанчалик муҳим эканини яхши биламиз. Ҳар бир футболчи бор кучини майдонда намоён этишга тайёр. Биз фаворит эмасмиз, лекин финалда бу аҳамиятли эмас — бу ерда ҳамма нарса мумкин”, — деди Александр Хомяков.
Мураббийнинг таъкидлашича, жамоа лигадаги йирик мағлубиятдан хулоса чиқарган ва бу сафар ўтган хатоларни такрорламасликка ҳаракат қилмоқда. “Албатта, аввалги ўйинда ҳимояда бир қатор камчиликлар бўлганди, аммо уларни бартараф этиш устида ишладик. “Пахтакор” тажрибали жамоа, уларнинг кучли тарафларини ёпишга жиддий эътибор қаратдик”, — деди у.
Шу билан бирга, мураббий психологик тайёргарликнинг аҳамиятини ҳам таъкидлади: “Бу финал нафақат жисмоний, балки руҳий жиҳатдан ҳам синов бўлади. Менинг футболчиларим бундай босимга тайёр. Ҳар бир мураббий каби мен ҳам из қолдиришни, жамоам билан соврин ютишни орзу қиламан.”
Жамоа етакчиси Азизбек Амонов эса финалга чиқиш улар учун катта имконият эканини таъкидлади. “Бу финал — биз учун биринчи, аммо биз курашишдан чекинмаймиз. ‘Пахтакор’ катта тажрибага эга жамоа, лекин биз ҳам ўз сўзимизни айтамиз. Бор кучимиз билан ҳаракат қиламиз, қолгани Аллоҳдан”, — деди у.
Амонов “Бунёдкор”га қарши ўйиндаги ғалабани мисол қилиб, “ўшанда ҳам жамоавий ўйин ва бирдамлик ютқазмади, финалда ҳам шундай руҳ билан майдонга чиқамиз”, — дея қўшимча қилди.
Шу тариқа, “Бухоро” жамоаси кубок финали олдидан фақат ғалаба ҳақида ўйлаяпти. Улар учун бу нафақат соврин учун кураш, балки ўз тарихларига янги саҳифа ёзиш имконияти ҳам бўлади.
“Zamin”ни Telegram'да ўқинг!
