Англия чемпиони “Ливерпул”да жиддий ўзгаришлар бошланмоқда. Сўнгги ҳафталардаги мағлубиятлар ва ночор ўйинлардан сўнг бош мураббий Арне Слот жамоада таркибий қайта қуришга қарор қилди. Мерсисайд клубидаги бу жараён кўплаб футболчилар тақдирига таъсир этиши мумкин.
Энг катта ўзгаришлардан бири — италиялик ҳужумчи Федерико Кьеза билан боғлиқ. Ундан жамоа яқин ҳафтарда расман қутилмоқчи. Арне Слотнинг қароридан маълум бўлишича, клуб Кьезадан воз кечишга тайёр.
Кьеза 2024 йилнинг ёзида “Ювентус”дан “Ливерпул”га кўп умидлар билан келганди. Ўша пайтда мухлислар унинг ҳужум чизиғида жамоага янги куч, динамизм ва ижодкорлик бағишлашини кутган эди. Аммо ҳаёт бу умидларни оқламади.
Футболчи дебют мавсумида ўзини тўлиқ кўрсата олмади — барча мусобақаларда жами 14 марта майдонга тушиб, таъсирли натижа қайд этмади. Унинг ўйини кўпинча номутаносиб бўлди, жамоавий тизимга мослаша олмади ва Слот қўллаётган тезкор прессинг услубига тўлиқ мос келмади.
Жорий мавсумда ҳам вазият яхшиланмади. Федерико бу вақтга қадар бор-йўғи 9 учрашувда майдонга тушди ва жами 245 дақиқа ўйин амалиётига эга бўлди. Унинг ҳисобига икки гол ва учта ассист ёзилган, аммо бу кўрсаткич “Ливерпул” миқёсидаги жамоа учун жуда кам деб баҳоланмоқда.
Арне Слот матбуот анжуманида Кьезанинг ўйини ҳақида гапирар экан, “У яхши футболчи, аммо ҳозирги тактик фалсафамизга мос келмаяпти. Биз жамоа манфаати учун энг тўғри ечимни топишимиз керак”, — деган фикрни билдирди.
Бу қарордан сўнг Кьеза агентлари бошқа клублар билан музокараларни бошлаган. Италия ва Испания клубларидан қизиқиш борлиги хабар қилинмоқда. Футболчининг ўзи ҳам 2026 йил январ ойида мунтазам ўйин амалиёти топиш учун бошқа жамоага ўтишга тайёрлигини билдирган.
Шу билан бирга, агар қишки трансфер амалга ошмаса, Кьеза ёзда яна бир бор клубни алмаштиришга уринмоқчи. “Ливерпул” эса у кетган тақдирда унинг ўрнини ёш, фаол ва тизимга мос ҳужумчи билан тўлдиришни режалаштирмоқда.
Мутахассислар фикрича, Слотнинг бу қарорлари клубда янги давр бошланишидан дарак бермоқда. У жамоани қайта қуришни, тактик балансни яхшилашни ва аниқ режа асосида “Ливерпул”ни яна Европа чўққиларига қайтаришни мақсад қилган.
Кьеза учун эса бу қарор янги бошланиш бўлиши мумкин. У ўзининг “Янги мен”ини бошқа чемпионатда намойиш этиш имконига эга бўлади. Шу билан “Ливерпул” ҳам, Кьеза ҳам янги саҳифани очиши кутилмоқда.
“Zamin”ни Telegram'да ўқинг!
