Ливерпул клуби кутилмаган баёнот билан чиқиб, жамоа бош мураббийи Арне Слот билан хайрлашганини расман эълон қилди. Нидерландиялик мутахассис Энфилддаги икки йиллик фаолиятидан сўнг Англия Премер-лигаси гигантини тарк этди. Ушбу қарор жамоанинг совринсиз якунланган омадсиз мавсумидан сўнг қабул қилинди. Бу ҳақда Goal.com хабар беради.
Клуб ва эгалари томонидан эълон қилинган қўшма баёнотда Слотнинг истеъфоси жуда қийин қарор бўлгани таъкидланган. Арне Слот ўзининг дебют мавсумида Англия Премер-лигаси чемпионлигини қўлга киритган бўлса-да, кейинги пасайиш натижасида жамоа турнир жадвалида бешинчи ўринни эгаллади ва барча совринлардан қуруқ қолди.
Клуб раҳбарияти мураббийнинг меҳнатсеварлиги ва профессионаллигини юқори баҳолаб, унга миннатдорчилик билдирди: “Арне Слотнинг Ливерпул учун қўшган ҳиссаси беқиёс. У ўз соҳасининг етакчиси эканини исботлади. Шунга қарамай, жамоанинг келажакдаги ривожи учун йўналишни ўзгартириш вақти келди деб ҳисоблаймиз”.
Истеъфодан сўнг кўп ўтмай, таниқли журналист Fabrizio Romano орқали Арне Слотнинг мухлисларга йўллаган мурожаати эълон қилинди. Мураббий Ливерпулдаги фаолиятидан мамнунлигини билдириб, шундай деди: “Ливерпул билан бирга ўтказган вақтим ажойиб саёҳат бўлди. Ўтган мавсумда чемпионликни қўлга киритганимиздан жуда миннатдорман”.
Арне Слот Ливерпул тарихида чемпион мураббий сифатида қолади. Клуб раҳбарияти унинг мероси сақланиб қолишини ва у ҳар доим Энфилдда азиз меҳмон бўлишини таъкидлади. Эндиликда мерсисайдликлар янги мавсум учун бошқа номзодларни кўриб чиқишни бошлайдилар.
“Zamin”ни Telegram'да ўқинг!
