Барселона сафарда Реалга қарши ўйинда 1:2 ҳисобида мағлубиятга учради. Ушбу баҳсда каталонияликлар дарвозабони Войцех Шесни Килиан Мбаппе ижросидаги пенальтини қайтариб, эътиборни тортди.
Шесни шу тариқа Мессининг, Мбаппениг ва Неймарнинг пенальтисини қайтарган ягона дарвозабон бўлиб қолмоқда. "Яхши рўйхат, лекин ҳозир бу ҳақида кўп ўйламайман.
Балки, ёши улғайганимда бу муваффақиятнинг қийматини тўғри баҳоларман", – деди Шесни Барселонанинг YouTube каналида эълон қилинган видеода. Шесни ўйинлардан олдин рақиб жамоаларнинг пенальтичиларини чуқур таҳлил қилишини ҳам тан олди.
"Мен рақибларни кўп ўрганаман. Уларнинг пенальтидан охирги 20та зарбаларини таҳлил қиламан – қаерга уришади, қандай тезликда, қанчалик ишончли.
Эль-Класико олдидан Мбаппени ўрганиб чиқдим. У охирги сафар зарба йўллаган жойга сакрадим", – дея изоҳ берди Шесни.
Барселонанинг яқинлашиб келаётган ўйини 2-ноябр куни Эльчега қарши бўлиб ўтади.
