“Арсенал” сўнгги марта 2004 йилда Англия Премьер-лигасида чемпион бўлган эди. Ўшанда “тўпчилар” мавсумни мағлубиятсиз якунлашга муваффақ бўлишган.
Бу натижани ҳали ҳеч бир жамоа такрорлай олмади. Сўнгги йилларда “Арсенал” сезиларли равишда ўсишга эришди, бироқ чемпионатни иккинчи ўринда якунлаб келмоқда.
Жорий мавсумда эса Микел Артета жамоаси мусобақа жадвалида етакчилик қилмоқда. Артетадан ушбу мавсум Премьер-лига чемпионлигини қўлга киритиш учун идеал имконият эканлиги борасида сўрашди.
"Бу биз учун катта имконият. Лекин биз бу қанчалик мураккаб эканлигини яхши тушунамиз.
Барқарор ўйин кўрсатишда давом этишимиз керак. Эртага бизни жуда қийин ўйин кутмоқда.
Ғалаба қозониш учун ўз ўйинимизнинг максимал даражасини кўрсатишимиз лозим", – деди Артета матбуот анжуманида. 1-ноябр куни “Арсенал”нинг рақиби “Бёрнли” бўлади.
