ПСЖ бош мураббийи Луис Энрике Франция чемпионати доирасида "Нитсса"га қарши ўйиндан кейин ўз фикрларини билдирди. Париж клуби 1:0 ҳисобига ғалаба қозонди, ягона голни Гонсалу Рамуш киритди.
"Шундай тарзда ғалаба қозониш жуда ёқимли – сўнгги дақиқаларда, охирги ҳаракат билан ва куйлаётган мухлислар қуршовида. Бизнинг барча ўйинчиларимизда бундай характер борлиги ва ғалабани қўлга киритганимиздан мамнунман.
Ўйлайманки, бу ғалаба ҳақли эди, биз жуда бахтиёрмиз", – деди ПСЖ расмий сайти мураббийнинг сўзларини келтириб. Энрике, шунингдек, Гонсалу Рамушнинг ўйинини ҳам юқори баҳолади: "Бу ҳам Гонсалу, ҳам бутун жамоа учун ажойиб натижа.
ПСЖ сафида 100 ўйин ўтказган бўлиш – катта ютуқ. Биз ундан фахрланамиз.
У майдонда 15-20 дақиқа ичида яхши ҳаракат қилди ва киритилган гол унинг ўзига бўлган ишончини мустаҳкамлаш учун муҳим бўлди." Ушбу ўйиндан сўнг ПСЖ 24 очко билан биринчи ўринни эгаллаб турибди. "Марсель" 22 очко билан иккинчи, "Монако" эса 20 очко билан учинчи ўринда жойлашган.
