Юлдуз футболчи Криштиану Роналду Пирс Морган билан ўтказган интервьюсининг иккинчи қисмида Лионел Месси бошчилигидаги Аргентина терма жамоасининг сўнгги жаҳон чемпионатидаги ғалабаси ҳақида фикр билдирди.
"Месси келгунига қадар Аргентина жаҳон чемпионатини неча марта ютган? Икки марта? Бу одатий ҳол.
Бундай юксак даражадаги терма жамоалар катта турнирларда ғалаба қозонишга одатланган. Масалан, агар Бразилия жаҳон чемпионатини ютса, бу ҳеч кимни ҳайрон қолдирмайди.
Аммо агар Португалия ютса, бу, албатта, дунёни ҳайратга солади. Балки бу ҳақида ўйламаслик ҳам керакдир", - деди Роналду.
Маълумот учун, Аргентина терма жамоаси жаҳон чемпионатида 1978, 1986 ва 2022 йилларда ғалаба қозонган. Португалия эса ҳали бирор марта ҳам жаҳон чемпиони бўлмаган.
Ушбу жамоанинг энг яхши натижаси 1966 йилда учинчи ўринни қўлга киритиш бўлган.
