Криштиано Роналдо Саудия Арабистонига кўчиб ўтганидан бери илк бор чемпионлик унвонини қўлга киритди. Саудия Pro лигасининг сўнгги турида Ал-Насср жамоаси Дамак Клуб устидан 4:1 ҳисобида ғалаба қозониб, узоқ кутилган чемпионликни расмийлаштирди. Бу ҳақда Goal.com хабар беради.
Ҳозирда 41 ёшда бўлган Португалия юлдузи ушбу учрашувда дубл қайд этиб, ғалабага муносиб ҳисса қўшди. Бу унинг 2020-йилда Ювентус таркибида қўлга киритган совринидан кейинги илк йирик муваффақиятидир. Ҳакамнинг финал ҳуштаги чалинганидан сўнг, Криштиано Роналдо ҳиссиётларини жиловлай олмади ва кўз ёшларини тутиб тура олмади.
2023-йил бошида Саудия клубига келиб қўшилганидан бери Роналдо мунтазам равишда диққат марказида бўлиб келмоқда. У ўтган икки мавсумда 35 ва 25 та гол билан тўпурарлар пойгасида ғолиб чиққан бўлса-да, унинг жамоаси ҳар сафар иккинчи ўрин билан кифояланган эди.
Реал Мадрид таркибида беш бор Чемпионлар лигаси ғолиби бўлган ҳужумчи энди Португалия терма жамоаси сафида АҚШ, Мексика ва Канада мезбонлик қиладиган Жаҳон чемпионатига йўл олади. Бу у учун рекорд даражадаги олтинчи мундиал бўлади. Лионел Месси ҳам олтинчи бор турнирда иштирок этишга яқин турибди, бироқ амалдаги чемпион Аргентина ҳали ўз таркибини эълон қилгани йўқ.
“Zamin”ни Telegram'да ўқинг!
