MLS клуби “Атланта Юнайтед” расман эълон қилди — жамоани яна тажрибали аргентиналик мутахассис Херардо Мартино бошқаради. 62 ёшли мураббий клуб билан 2027 йил мавсуми охиригача амал қиладиган шартнома имзолади. Бу қарор АҚШ футболида катта қизиқиш билан кутиб олинди, чунки Мартино “Атланта” тарихидаги илк муваффақиятли мураббийлардан бири саналади.
2017 йилда айнан у жамоанинг илк бош мураббийи сифатида “Атланта Юнайтед”ни шакллантирган ва бир йил ўтиб — 2018 йилда жамоани MLS Кубоги ғолиблигига олиб чиққан. Бу натижа нафақат клуб тарихидаги илк катта ютуқ бўлди, балки Мартинога ҳам шахсий мукофот — “Йил мураббийи” совринини тақдим этди.
Кўпчилик унинг бу клубга қайтиши ортидан “Атланта”нинг янги тикланиш даври бошланади, деб ҳисобламоқда. Чунки Мартино ўз услубига эга мураббий — тезкор прессинг, юқори интенсивлик ва тажовузкор ҳужумлар унинг жамоаларига хос услуб ҳисобланади.
Мартинонинг мураббийлик фаолияти жуда бой. У Европа ва Жанубий Америкада катта тажриба тўплаган. Бир пайтлар у дунёдаги энг нуфузли клублардан бири — “Барселона”ни ҳам бошқарган, шунингдек, Аргентина, Парагвай ва Мексика терма жамоаларида ишлаган.
Сўнгги йилларда Херардо Мартино Лионел Месси бошчилигидаги “Интер Майами” клубига раҳбарлик қилди ва жамоани янги босқичга олиб чиқди. Энди эса у яна “Атланта”га қайтиб, янги лойиҳа устида иш бошлайди.
Клуб раҳбариятининг сўзларига кўра, бу қарор жамоа фалсафасини қайта шакллантириш ва юқори мақсадларга қайтиш учун қабул қилинган. “Мартино нафақат тажрибали мураббий, балки бизнинг тарихимиздаги муҳим шахс. У “Атланта” маданиятини яратган инсонлардан бири”, — дейилади клуб баёнотида.
Мартино эса ўз баёнотида шундай деди:
“Мен бу шаҳар ва жамоани яхши биламан. Бу ерда ишлаганимда қандай муҳит борлигини ҳис қилганман. Энди эса яна юқори мақсадлар учун курашиш вақти келди. Биз янги саҳифани очамиз ва мухлисларга яна ғурур туйғусини бахш этамиз”.
Футбол мухлислари унинг қайтиши ортидан “Атланта Юнайтед” қайтадан MLS чемпиони бўлиши мумкинлигини муҳокама қилмоқда. Мартинонинг қайта келишини кўпчилик “иккинчи бошланиш” деб баҳоламоқда.
“Zamin”ни Telegram'да ўқинг!
