Германия Бундеслигасида ўйнаётган “Волфсбург” клуби ўзининг бош мураббийи Паул Симонис билан ҳамкорликни тўхтатди, деб хабар берди жамоа матбуот хизмати.
Маълумотларга кўра, “бўрилар” сўнгги учта баҳсда, жумладан Германия Кубогида ҳам мағлубиятга учраган. Бу натижалар жамоани турнир жадвалида хавфли ҳудудга яқинлаштириб қўйди — “Волфсбург” ҳозирги пайтда 10-турдан сўнг 14-ўринда жойлашган.
Паул Симонис жамоани ўтган ёзда қабул қилиб олганди. Унгача у Нидерландиянинг “Гоу Эхед Иглс” клубини бошқарган ва ёшлар билан ишлашдаги маҳоратли мураббий сифатида танилган эди. Бироқ Германиядаги биринчи мавсуми омадсиз бошланди — жамоа нафақат очко йўқотди, балки ўйин услубида ҳам кутилган даражадаги интизомни намойиш эта олмади.
Клуб раҳбариятининг фикрича, натижалар ва жамоа руҳиятини яхшилаш учун раҳбарликда ўзгаришлар зарур. Шу боис, бош мураббий лавозими вақтинчалик тарзда “Волфсбург” ёшлар жамоаси устози Даниэл Бауэрга топширилди. Унинг асосий вазифаси — жамоадаги руҳий ҳолатни тиклаш ва “Байер”га қарши бўладиган навбатдаги баҳсга жамоани тайёрлаш.
“Волфсбург”нинг янги раҳбарияти клубнинг олдида турган энг муҳим вазифа — мавсум охиригача барқарор натижа кўрсатиш ва юқори ўринларга қайтиш эканини таъкидламоқда. Шу билан бирга, жамоа мухлислари раҳбариятдан доимий бош мураббий номини тез фурсатда эълон қилишни кутиб турибди.
Келаси баҳс 22 ноябрь, шанба куни бўлиб ўтади. Рақиб — чемпионлик учун курашаётган “Байер” ва айнан шу ўйин “Волфсбург” учун янги саҳифа бўлиши мумкин.
“Zamin”ни Telegram'да ўқинг!
