U-17 жаҳон чемпионатида 3-тур баҳсларидан сўнг Ўзбекистон ўсмирлар терма жамоаси плей-офф босқичига чиқди. Панамага қарши 6:1 ҳисобидаги йирик ғалаба ортидан жамоа мухлислар қалбини қувончга тўлдирди. Ўйинда биринчи гол муаллифи бўлган Абубакр Шукуруллаев беллашувдан кейин ЎФА матбуот хизматига ўз фикрларини билдирди.
Ёш ҳужумчи суҳбат давомида жамоанинг дастлабки дақиқалардаги қийинчиликлари ва танаффусдаги бурилиш нуқтаси ҳақида тўхталиб ўтди:
“Панамага қарши ўйин биз учун осон кечмади. Биринчи бўлимда рақиб ҳимояси қаттиқ бўлди, биз эса ўз ўйинимизни тополмадик. Аммо танаффусда Исломбек Исмоилов биз билан жуда кучли суҳбат ўтказди, ишонч ва мотивация берди. Шу сўзлардан кейин майдонга бошқача кайфият билан чиқдик. Иккинчи бўлимда ўзимизни қўлга олдик ва рақиб дарвозасига олти маротаба тўп киритдик”, — деди Шукуруллаев.
Футболчининг сўзларига кўра, бу ғалаба нафақат жамоа, балки бутун мамлакат учун аҳамиятли натижа бўлди:
“Биз ҳар бир мусобақада Ватан, ота-оналаримиз ва мураббийларимиз учун ўйнаймиз. Улар бизга ишонишган, биз эса уларнинг ишончини оқлаш учун ҳаракат қилдик. Бу Жаҳон чемпионатида ҳам шундай. Фақат бу гал бизга яна бир нарса қўшилди — уни чемпион бўлганимиздан кейин айтаман,” — дея сирли илова қилди ёш футболчи.
Абубакр Шукуруллаев бу мусобақада нафақат голлари, балки ҳаракатчанлиги, фидойилиги ва жамоага бўлган муносабати билан ажралиб турибди. Унинг Панамага қарши урган голи жамоага руҳий куч бағишлаб, иккинчи бўлимдаги гол ёмғирининг бошланишига сабаб бўлди.
Мураббийлар ҳам Шукуруллаев ҳақида илиқ фикр билдиришди: “У ҳар бир машғулотда ўз устида ишлайди, иштиёқи ва интизоми билан бошқаларга намуна. Бугунги ғалабада унинг ҳиссаси катта,” — деди жамоа мураббийи.
Ўзбекистон терма жамоаси Панамани йирик ҳисобда мағлуб этгач, “J” гуруҳида 6 очко билан плей-офф босқичига йўлланмани таъминлади. Энди жамоа навбатдаги босқичда янада кучли рақибларга қарши баҳс олиб боради.
J гуруҳидаги якуний вазият:
Мухлислар эса Шукуруллаев ва унинг жамоадошларидан янги ғалабалар кутишмоқда. Чунки бу жамоа — нафақат ёш, балки иродавий жиҳатдан ҳам пухта шаклланган авлод эканини яна бир бор исботлади.
“Zamin”ни Telegram'да ўқинг!
