Жаҳон кубоги доирасидаги навбатдаги муҳим ўйин — Жавоҳир Синдаров ва Хосе Мартинес ўртасидаги тезкор шахмат баҳси ўз якунига етди. Юқори темпда кечган 10 дақиқалик дуэлнинг дастлабки ўйинида томонлар бир-бирини четлатишга уринган бўлса-да, позицион мувозанат сақланиб қолди ва натижа дуранг билан якунланди.
Бироқ иккинчи ўйин бутунлай бошқача манзарани тақдим этди. Жавоҳир Синдаров бошиданоқ вазиятни ўзи томонга буришга муваффақ бўлди. У рақибининг стратегиясидаги бўшлиқларни аниқ ҳис қилди ва босимни босқичма-босқич кучайтира борди. Охир-оқибат ҳал қилувчи хатони Хосенинг ўзи йўл қўйди — кейинги ҳаракатларда позицияни тиклаш имкони қолмади ва ўзбекистонлик гроссмейстер ишончли ғалабани қўлга киритди.
Ушбу натижа билан 2025 йилги Жаҳон кубогининг ярим финал жуфтликлари ҳам расман аниқ бўлди. Хитойнинг маҳоратли шахматчиси Вей Йи россиялик Андрей Эсипенко билан тўқнаш келади. Жавоҳир Синдаров эса ҳамюрти, сўнгги йилларда жадал ўсишини намоён қилаётган Нодирбек Якуббоевга қарши саф тортади.
Мазкур ярим финал баҳслари 21 ноябрь, жума куни старт олади. Шахмат олами икки ўзбек маҳоратли шахматчиси ўртасидаги тўқнашувни интизорлик билан кутаяпти — бу нафақат уларнинг шахсий йўли, балки Ўзбекистон шахмат мактаби нуфузи учун ҳам ўта муҳим синов бўлади.
“Zamin”ни Telegram'да ўқинг!
