Ўзбекистон терма жамоасининг Мисрга қарши Ал Айн кубоги ярим финалида ўтказган учрашувидаги 2:0 ҳисобидаги ишончли ғалабаси нафақат маҳаллий мухлислар, балки мисрлик спорт жамоатчилигининг ҳам катта эътиборини қозонди. Африка қитъасининг футболдаги энг нуфузли мамлакатларидан бири бўлган Мисрда бу мағлубиятдан сўнг жамоа ва мураббийлар штаби кескин танқид остида қолди.
Мисрнинг собиқ футболчиси Аҳмад Билол ўйиндан кейинги чиқишида ўз эҳтиросли фикрларини яширмади. Унинг таъкидлашича, Ўзбекистон майдонда Мисрга ҳақиқий маънодаги футбол дарси берди ва ҳисоб бундан ҳам йирик бўлиши мумкин эди.
— «Ўзбекистон бизга футболнинг чин маъносини кўрсатди. Улар жуда ўйин дисциплинасига эга жамоа экан. Ҳатто бошқа вазиятларда яна бир неча бор гол уриши ҳам мумкин эди», — деди Билол.
Унинг фикрича, Мисрнинг асосий таркиб билан майдонга тушганига қарамай, ўзаро кучлар нисбати кутилганидек бўлмади:
— «Биз бу жамоани харитадан ҳам топилмайдиган, футболда жиддий рақобатчи эмас деб ўйлардик. Лекин улар биздан тўлиқ устун бўлди. Ўзбекистон бизга футбол дарси берди, холос», — дея тан олди собиқ ҳужумчи.
Ўзбекистон терма жамоасининг бундай ишонарли ўйини жамоа тайёргарлиги, тактик барқарорлиги ва ёш авлоднинг тез ўсиб келаётганини яна бир бор намоён қилди. Миср оммавий ахборот воситалари эса бу мағлубият миллий жамоа учун жиддий сигнал эканини таъкидламоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
