Лондоннинг "Арсенал" жамоаси ярим ҳимоячиси Деклан Райс "Челси" ўйинчиси Мойсес Кайседо билан таққослашлар ҳақида фикр билдирди. Футбол жамоатчилиги фикрига кўра, инглиз ва эквадорлик футболчилар айни дамда Премьер-лиганинг энг яхши ярим ҳимоячилари ҳисобланади.
Якшанба куни уларнинг жамоалари чемпионатнинг 13-турида ўзаро беллашади. "Мен Кайседони жуда ҳурмат қиламан – ўтган мавсумда мен уни Премьер-лиганинг йилнинг энг яхши жамоаси таркибига киритган эдим.
У ўзини ажойиб тарзда кўрсата олди. Бизни кўп ҳолларда таққослашади, лекин биз турли позицияларда ўйнаймиз", – деди Райс Чемпионлар Лигаси доирасида "Бавария" устидан 3:1 ҳисобида қозонилган ғалабадан сўнг CBS Sportsга берган интервьюсида.
Ҳозирда "Арсенал" Премьер-лига турнир жадвалида 29 очко билан етакчилик қилмоқда. "Челси" эса 23 очко билан иккинчи ўринда бормоқда.
