Google Apple’дан ўзиб кетиб, дунёдаги энг қиммат брендга айланди

Brand Finance консалтинг фирмаси ўтказган тадқиқот натижаларига кўра, дунёдаги энг қимматбаҳо брендлар рейтингида биринчи бешта ўринни Америка компаниялари эгаллади, деб ёзади «Дарё». Биринчи ўринга эса Google интернет-компанияси чиқиб олди, ўтган йил ичида бренд нархи қарийб 25 фоизга ошиб, 109,47 миллиард долларга етди.

Apple бренди тахминан 27 фоизга — 107,141 миллиард долларгача арзонлашиб, натижада рейтингда иккинчи ўринга тушиб қолди. Учинчи ўринни Amazon.com интернет-ритейлери ўзида сақлаб қолди (106,396 миллиард доллар, ўсиш 53%). Тўртинчи ва бешинчи поғоналарда AT&T телекоммуникация компанияси (87,016 миллиард доллар, ўсиш 45%) ва Microsoft (76,265 миллиард доллар, ўсиш 13%) жойлашди.

Рейтингнинг кейинги ўринларини Samsung (66,219 миллиард доллар, ўсиш 13%), Verizon (65,875 миллиард доллар), Walmart (62,211 миллиард доллар) ва Facebook (61,998 миллиард доллар) эгаллади. Хитойнинг энг йирик Industrial & Commercial Bank of China (ICBC) банки 47,832 миллиард доллар кўрсаткич билан юқори ўнликни якунлади.

Янгиликлар