«Арсенал» автоголлар эвазига «Вулверхэмптон»дан қийин ғалаба олди

Шанба куни Лондоннинг «Эмирейтс» стадионида «Арсенал» АПЛнинг сўнгги поғонасидаги «Вулверхэмптон»ни қабул қилди. Учрашувда «канонирлар» тўлиқ устунлик қилди: рақиб деярли бутун ўйин давомида мудофаа билан банд бўлди ва бор-йўғи бир марта дарвоза томон зарба йўллади.

Бироқ «Арсенал» ҳам узоқ вақт давомида аниқ зарбалар билан муаммога дуч келди ва ғалаба тақдирини асосан рақибнинг хатолари ҳал қилди. Биринчи бўлимда мезбонлар босимни эрта бошлади.

Ўнг қанотдан узатилган тўпдан сўнг Юрриен Тимбер беш метрлар атрофида бош билан зарба берди, бироқ тўп дарвоза устунидан юқорига кетди. «Вулверхэмптон» сафида Хван Хи-чан марказдан ёриб кириб, жарима майдони ичидан чап бурчакка йўллаган зарбасини бироз аниқ бажара олмади.

Бошқа вазиятда Букайо Сака ўнг қанотдан пастлатиб узатди, ҳужумга қўшилган Габриэл Мартинелли зарба беришга уриниб, ҳимоячига тегизди ва мезбонлар бурчак зарбасига эга бўлди. Иккинчи бўлимда ҳам «Арсенал» ҳужумни давом эттирди.

Мартинелли чап томондан дарвозага чиқиб зарба берди, аммо нишонга теккиза олмади. Деклан Райс 20 метрлар чамаси масофадан жарима зарбасини ижро этди: дарвозабон тўпни қайтариб, уни бурчакка чиқариб юборди.

Кейинроқ Райс чап қанотдан узоқ устун томон бураб узатган тўпини ҳам дарвозабон сакраб ушлашга яқин бўлиб, хавфни бартараф этди. 70-дақиқада ҳисоб очилди.

Сака ўнг томондан бурчак зарбасини оширди, тўп узоқ устунга тегди ва дарвозабоннинг орқасига урилиб, дарвозага кириб кетди — 1:0. Қолган дақиқаларда «Арсенал» бир неча бор иккинчи голга яқин келди, аммо якуний зарбалар аниқлиги етишмади.

Ўйиннинг охирида «Вулверхэмптон» кутилмаганда жавоб қайтарди. 90-дақиқада Матеуш Мане жарима майдони марказига аниқ пас берди, Толу Арокодаре эса бош билан чап бурчакка йўллаб, ҳисобни тенглаштирди — 1:1.

Бироқ қўшиб берилган вақтнинг тўртинчи дақиқасида «Арсенал» яна олдинга чиқди: Сака ўнг қанотдан дарвоза олдига оширди, Габриэл Жезус тўпга етиб бора олмади, аммо ҳимоячи Йерсон Москера тўпни бош билан ўз дарвозасига киритиб қўйди — 2:1. Шу тариқа «Арсенал» ғалаба ҳисобига «Манчестер Сити»дан беш очкога илгарилаб олди (бироқ лондонликлар бир ўйин кўпроқ ўтказган).

«Вулверхэмптон» эса икки очко билан турнир жадвалининг энг қуйи поғонасида қолмоқда; жамоа кетма-кет 10-учрашувда мағлуб бўлган. “Zamin”ни Telegram'да ўқинг!