«Милан» бош мураббийи Массимилиано Аллегри Италия Суперкубоги ярим финали доирасида «Наполи»га қарши бўладиган муҳим тўқнашув олдидан жамоанинг тайёргарлиги ва рақиб ҳақидаги фикрлари билан ўртоқлашди. Беллашув 18 декабрь куни Саудия Арабистони пойтахти Ар-Риёд шаҳрида ўтказилади ва Тошкент вақти билан соат 00:00 да старт олади.
Италиялик мутахассиснинг таъкидлашича, Суперкубок учрашуви оддий чемпионат баҳсларидан тубдан фарқ қилади. Бу плей-офф форматидаги ўйин бўлиб, унда хато қилишга ўрин йўқ. Аллегрининг сўзларига кўра, ягона мақсад — финалга йўл олиш.
Мураббий «Наполи» жамоасининг руҳий ҳолатига алоҳида тўхталди. Унинг фикрича, кетма-кет икки мағлубиятдан сўнг неаполликлар майдонга жуда катта иштиёқ ва ғазаб билан чиқади. «Уларнинг ҳам мақсади бизники каби — ғалаба ва финал. Шу боис, биздан тактик жиҳатдан етук, тўлиқ жипслашган ўйин талаб этилади», — деди Аллегри.
Шунингдек, у Антонио Конте жамоаларининг қийин вазиятларда ўз имкониятларини тўлиқ ишга солишини яхши билишини таъкидлади. Аллегрининг фикрича, бундай рақибга қарши нафақат жисмонан, балки руҳий жиҳатдан ҳам пухта тайёр бўлиш жуда муҳим.
Таркиб масаласига тўхталар экан, Аллегри Фофана тўлиқ тайёр эканини, Леаунинг ҳолати эса машғулотдан кейин аниқланишини айтди. Салемакерснинг универсаллиги жамоага мувозанат беришини, у ҳужумда ҳам, ҳимояда ҳам фаол ҳаракат қила олишини таъкидлади. Шунингдек, Атекаме ва Яшарининг тиклангани «Милан» учун қўшимча вариантлар яратаётганини қайд этди.
Мутахассиснинг фикрича, ушбу баҳс нафақат жисмоний кураш, балки ақл ва сабр синови ҳам бўлади. Мухлислар эса Ар-Риёдда қизиқарли, кескин ва принципиал тўқнашув гувоҳи бўлишлари кутилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
