ФИФА Кенгаши 2026 йили бўлиб ўтадиган Жаҳон чемпионати учун тарихдаги энг йирик молиявий маблағ — 727 миллион доллар ажратилишини расман тасдиқлади. Бу кўрсаткич Қатарда ўтказилган аввалги мундиалга нисбатан нақ 50 фоизга кўп демакдир. Инглиз журналисти Бен Жейкобснинг хабар беришича, ушбу рекорд сумма турнирда иштирок этувчи миллий терма жамоалар ўртасида тақсимланади.
Ўзбекистон учун кафолатланган миллионлар
ЖЧ-2026 йўлланмасини қўлга киритган ҳар бир жамоа, жумладан, Ўзбекистон миллий терма жамоаси ҳам турнирга тайёргарлик кўриш учун 1,5 миллион доллар миқдорида сармоя олади. Шунингдек, мусобақада 33-48-ўринларни эгаллаган жамоаларга 9 миллион доллар тўланади.
Бу дегани, ҳамюртларимиз Америка майдонларига қадам қўйишлари билан федерация ҳисобига камида 10,5 миллион доллар кафолатланган маблағ тушишини англатади.
Натижаларга қараб ўсувчи бонуслар
Жамоамиз муваффақиятли одимлаб, кейинги босқичларга чиқса, ФИФА томонидан бериладиган мукофот пуллари ҳам сезиларли даражада ошиб боради:
- 17-32-ўринлар: $11 млн;
- 9-16-ўринлар: $15 млн;
- 5-8-ўринлар: $19 млн;
- 4-ўрин соҳиби: $27 млн;
- 3-ўрин соҳиби: $29 млн;
- Финалчи (2-ўрин): $33 млн;
- Жаҳон чемпиони: $50 млн.
Мундиал тақвими: Бизни қандай баҳслар кутмоқда?
Эслатиб ўтамиз, ЖЧ-2026 баҳслари АҚШ, Мексика ва Канада мезбонлигида 11 июндан 19 июлга қадар бўлиб ўтади. Ўзбекистон терма жамоаси гуруҳ босқичида қуйидаги кунларда майдонга тушади:
- 17 июнь: Колумбия — Ўзбекистон
- 23 июнь: Португалия — Ўзбекистон
- 27 июнь: Плей-офф ғолиби (Конго ДР/Ямайка/Янги Каледония) — Ўзбекистон
Бу тарихий мусобақада вакилларимизга нафақат молиявий муваффақият, балки чиройли ғалабалар тилаб қоламиз!
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
