Дайот Упамекано «Ливерпул»га таклиф қилинди

Мюнхеннинг «Бавария» клуби марказий ҳимоячиси Дайот Упамеканонинг хизматлари «Ливерпул»га бевосита таклиф қилинди. Бу ҳақда TZ нашри хабар берди.

Манбага кўра, франциялик футболчи «Бавария»да мураккаб вазиятга тушиб қолган. У янги шартнома бўйича йилига 18 миллион евро маош олишни истамоқда, шундан 16 миллиони базавий ойликни ташкил этади.

Шунингдек, Упамекано 65 миллион евролик товон пули банди (release clause) шартномага киритилишини талаб қилмоқда. Ҳозирча «Бавария» бу молиявий талабларнинг бирортасини ҳам қондириш ниятида эмас.

Жорий мавсумда 27 ёшли ҳимоячи барча мусобақаларда 20 та учрашувда майдонга тушиб, 1 та гол урди. Упамеканонинг «Бавария» билан амалдаги шартномаси келаси ёзда якунланади.

“Zamin”ни Telegram'да ўқинг!