«Ливерпул» бош мураббийи Арне Слот АПЛнинг 20-тури доирасида «Фулҳем»га қарши бўладиган баҳс олдидан ўз фикрлари билан ўртоқлашди. Учрашув 4 январь куни 20:00 да (Тошкент вақти билан) старт олади. Бу ҳақда euro-football.ru хабар беради.
Слотнинг таъкидлашича, лондонликлар ҳужумкор футбол намойиш этишга интилади ва тўп назоратида ҳам кўп вақт ўтказиши мумкин. Мураббий бу галги ўйин аввалгисига қараганда очиқроқ кечишини, шунингдек, сафардаги сўнгги натижа сабаб бу баҳс қийин бўлишини айтди.
Мутахассис сўнгги 7–8 ўйинда жамоаси рақибларга деярли имкония бермаётганини қайд этди. Бироқ у «Ливерпул» тўпга кўп эгалик қилаётган бўлса-да, рақиб дарвозаси олдида хавфли вазиятлар яратиш баъзан осон кечмаётганини ҳам яширмади.
Слот жамоанинг ҳозирги ўрни мантиқан адолатли эканини, чунки 19 та ўйиннинг барчасида доимий кураш бўлганини ҳам қўшимча қилди.
Ҳозирча «Ливерпул» 33 очко билан тўртинчи, «Фулҳем» эса 27 очко билан ўн иккинчи поғонада бормоқда.
“Zamin”ни Telegram'да ўқинг!
