«Барселона» спорт директори Деко ҳимоячи Андреас Кристенсенга янги шартнома таклиф қилиш нияти борлигини тасдиқлади. Бу ҳақда euro-football.ru хабар беради.
Деконинг айтишича, клуб футболчини ноқулай вазиятда қолдиришни истамайди, чунки у жароҳати сабаб мавсум охиригача майдонга қайтиши қийин. Шу боис каталонияликлар футболчи учун адолатли ва мақбул вариант тайёрлаб, уни кўриб чиқиш имконини бермоқчи. «Шундан кейин у қарорини ўзи қабул қилади. У «Барселона»да қолиши шарт эмас, аммо биз ҳеч бўлмаганда кўриб чиқадиган таклифни бериб, сўнг у ўзи учун нима яхши эканини танлашига шароит яратамиз», деди Деко матбуот анжуманида.
Кристенсен 2022 йилда «Челси»дан эркин агент сифатида «Барселона»га келиб қўшилган. Унинг каталонияликлар билан амалдаги шартномаси 2026 йил 30 июнгача мўлжалланган. Жорий мавсумда даниялик футболчи 17 ўйинда майдонга тушиб, 1 та гол урди. Ҳозирда у боғлам узилиши билан боғлиқ жароҳатдан тикланмоқда.
“Zamin”ни Telegram'да ўқинг!
