BBC нашри Абдуқодир Ҳусанов ҳақида катта мақола эълон қилди. Унда ёш ҳимоячининг “Манчестер Сити”даги илк қадамлари, дебютдаги қийин лаҳзалар, тезлиги ва “ақл билан ўйнайдиган” услуби алоҳида таърифланади. Қисқаси, кечагина кўпчилик учун ном бўлган йигит бугун Англия футболида эътироф этилаётган персонажга айланяпти.
Премьер-лигада тарихий илк қадам
Ҳусанов Англия элита дивизионида майдонга тушган илк ўзбекистонлик футболчи сифатида тарихга кирди. Бу ўз-ўзидан катта воқеа. Аммо ҳар бир катта саҳнада биринчи чиқишнинг нархи бўлади.
BBC эслатганидек, ҳимоячининг “Сити” сафидаги дебюти қийин кечган: ўйиннинг 4-дақиқасидаёқ кетма-кет хатолар, ва натижада рақибнинг биринчи голига сабаб бўлган эпизод. Устидан-устак, кўп ўтмай сариқ карточка ҳам олган. Ўша баҳсда, 2025 йил январда “Челси”га қарши ўйинда, Ҳусанов 33 миллион фунт стерлинг эвазига жамоага қўшилган ҳимоячи сифатида янада кўпроқ диққат марказида бўлган.
Ўша оғир стартдан кейин фикрлар ҳам қаттиқ чиқди. Гари Невилл “йигит учун йиғлагим келди” деган бўлса, кейинроқ “Реал Мадрид”га қарши Чемпионлар лигасидаги мағлубиятдан сўнг Пол Робинсон уни “фара нурида қотиб қолган қуёнга ўхшарди” дея кескин таърифлаган.
Лекин футболда энг муҳим нарса — биринчи хато эмас, ундан кейин қандай туриб кетишинг.
Муваффақиятсизликдан таянч ҳимоячигача
BBC’нинг асосий фикри шунда: “Манчестер Сити” тўрт мусобақада ҳам юқори мақсадлар учун курашаётган бир пайтда, Ҳусанов аввалги қоқилишларни орқада қолдириб, ҳимоя чизиғида ишончли таянчлардан бирига айланди. Пеп Гвардиола уни “юқори савиядаги футболчи” деб атагани ҳам бежиз эмас.
Эътиборли жиҳат — 21 ёшли ҳимоячи уч йил ичида Беларусь лигасидан Англия Премьер-лигасигача бўлган жуда тез ва ҳайратланарли сакрашни амалга оширган. Бу оддий трансфер тарихи эмас, бу характер тарихи.
BBC қайд этишича, ёзда бўладиган Жаҳон чемпионатида ҳам Ҳусанов Ўзбекистон шарафини ҳимоя қилиши кутиляпти. Яъни у клубда ҳам, термада ҳам масъулияти катта бўлган ўйинчига айланмоқда.
“Жуда ақлли” деган баҳо бекор эмас
Ҳусанов бу мавсум “Сити” сафида барча мусобақаларда 22 марта майдонга тушган. У “Манчестер Юнайтед” (биринчи даврада) ва “Ньюкасл” мағлуб этилган баҳсларда, шунингдек, “Энфилд”да амалдаги чемпион “Ливерпуль” устидан иродавий ғалаба қозонилган ўйинда ҳам қатнашган.
“Ливерпуль”га қарши ўйиндан кейин Гвардиола Ҳусановнинг Муҳаммад Салоҳ ва Уго Экитике каби номдор ҳужумчиларга қарши жуда пухта ҳаракат қилганини таъкидлаган. Бироқ иккинчи бўлимда Абдуқодир “Сити” дарвозабони Жанлуижи Доннарумма билан тўқнашиб кетгач, алмаштирилган.
Тил масаласида ҳам қизиқ эпизод бор: Ҳусанов Манчестерга келганда инглиз тилини деярли билмаган. Гвардиола эса бу ҳақда ҳазил аралаш шундай деган: “У ҳали Уильям Шекспирдек гапирмайди, аммо кун сайин яхшиланяпти. Нимани исташимизни тушунади ва ҳар сафар яхшироқ ўйнаяпти. У жуда ақлли.”
Ҳусановнинг табиати ҳам BBC’да таърифланади: камгап, лекин майдонда “сўзини айтади” — ортиқча безаксиз, қатъий ва ишончли услубда.
Тезлик — замонавий футболда олтин нарх
Мақолада энг кўп урғу берилган нуқта — тезлик. Ҳусанов жорий мавсумда соатига 22 мил (тахминан 35 км/соат) тезликка чиққан. Бу Премьер-лигадаги ҳимоячилар орасида олтинчи кўрсаткич сифатида келтирилган. Етакчи натижа эса “Вулверхэмптон” футболчиси Жексон Чатчуада — 23,2 мил.
Бу имконсиз кўринган позициядан туриб ҳам Ҳусанов МЮ ярим ҳимоячиси Бруну Фернандешнинг Мбемога узатган тўпини қайтара олганди.
Статистика ҳам ёмон эмас: бу мавсумда Ҳусанов 17 марта тўпни олиб қўйиш ва 18 марта тўсиб қолишни амалга оширган. Ҳар икки кўрсаткичда у “Сити” таркибида иккинчи ўринда қайд этилган. Рубен Диаш, Йошко Гвардиол ва Жон Стоунз сафдан чиққан пайтда, Абдуқодир ҳимояда бўшлиқни тўлдиришда жуда муҳим вазифани бажарган.
"Бўрилар" "Сити"нинг прессингини четлаб ўтмоқчи бўлади, аммо Хусанов марказдан қанотга чиқиб, узатмани тўхтатади.
Таҳлилчилар фикрига кўра, “Сити”нинг юқори босим ва офсайд тузоғига асосланган хавфли услубида тезкор марказий ҳимоячи — ҳаётий зарурат. Чунки у ё рақибни офсайдга тушириш учун олдинга “ўқдек” чиқиши керак, ё узун узатмаларда орқага қайтиб хавфни ўчириши шарт.
Ҳусанов тўпни қабул қилиб олган Экитике билан дуэлга чиқишдан ақлли равишда воз кечди, чунки у Гакпонинг ёриб киришини пайқади. Ортга югуриш орқали у Гакпонинг дарвозабон билан бирга-бир чиқиб кетишини тўхтата олди.
BBC келтирган яна бир рақам: у ҳар 90 дақиқада ўртача 17,85 марта спринт амалга оширади — бу лигадаги марказий ҳимоячилар орасида энг юқори кўрсаткич сифатида қайд этилган.
Эндиги Ҳусанов — аввалгисидан бошқа
Албатта, тўп билан муомала қилганда баъзи мухлисларда ҳали ҳам ихтиёрсиз хавотир уйғониши мумкин. Бу — дебютдаги ўша оғир хотиранинг сояси. Лекин BBC ва Гвардиола айтмоқчи бўлган асосий гап битта: у ҳали ёш, ҳали пишади, аммо ўсиш суръати жуда тез.
Гвардиола унинг келажагига ишонади ва “Сити” кўп йиллар учун ишончли марказий ҳимоячига эга бўлганини таъкидлаган.
“Одатда жисмоний кучли футболчи кўп ўйлаб ўтирмайди, дейишади. Аммо у ҳар иккала сифатга ҳам эга. Шунинг учун тўп билан ўйнаши ҳам яхшиланиб бормоқда. Бу мени унинг яна ўсишига ишонтиряпти.
Менимча, у янада ривожланади. Қайта такрорлайман ‘Манчестер Сити’ кўп йиллар учун ишончли марказий ҳимоячига эга бўлди”, дейди клуб устози.
Қисқаси, кеча “фара нуридаги қуён” деб таърифланган йигит бугун Англия футболида ўз ўрнини топаётган, Ўзбекистон футболи учун эса янги эшикларни очаётган ҳимоячига айланди. Энди унинг олдидаги вазифа оддий: шу темпни сақлаш, тажриба тўплаш ва ҳар ўйинда ўзини янада мустаҳкам исботлаш. Мухлислар эса бундай йўлни кўришга тайёр — чунки бу ҳали бошланиши.
“Zamin”ни Telegram'да ўқинг!
