Англия Премьер-лигасининг 27-турида "Манчестер Сити" ўз майдонида "Ньюкасл"ни қабул қилди ва 2:1 ҳисобида ғалаба қозонди. Ушбу муҳим баҳсда ҳамюртимиз Абдуқодир Ҳусанов ҳам майдонга тушди — у иккинчи бўлим бошланиши билан Рубен Диаш ўрнига ўйинга қўшилди.
Гвардиола шогирдлари учун ҳар бир дақиқа олтинга тенг бўлган паллада Ҳусановнинг майдонга кириши шунчаки алмашинув эмас, балки аниқ ҳисоб-китоб қилинган тактик қарор бўлгани айтилмоқда. “Сити”ни ёритадиган манбалар ҳам Пеп Гвардиоланинг бу қадамини айнан стратегик ечим сифатида таъкидлаган.
Ҳимоячи қолган дақиқаларда ўзини йўқотмади: позиция танлаш, тўпга чиқиш, қаршилашувларда қатъият — ҳаммаси “ишончли режим”да бўлди. Натижада жамоа ўйинни сўнггигача ушлаб, жуда муҳим 3 очкони қўлга киритди.
Қатор статистик порталлар ҳамюртимиз ўйинини ижобий баҳолади. Хусусан, SofaScore нашри Ҳусановга 7 балл қўйди — бу марказий ҳимоячи учун, айниқса ўйинга кейинроқ қўшилган ҳолда, ёмон кўрсаткич эмас, аксинча “ўз вазифасини тоза бажарди” деган сигнал.
Маълумот учун, кейинги турда “шаҳарликлар” сафарда "Лидс"га қарши майдонга тушади. Учрашув 28 февраль куни бўлиб ўтади. Энди энг қизиғи — Ҳусанов шу ишончни сақлаб қолиб, навбатдаги баҳсда ҳам имкониятдан максимал фойдалана оладими?
“Zamin”ни Telegram'да ўқинг!
