Чемпионлар лигасида ҳал қилувчи палла яқинлашар экан, Мадриднинг “Реал” клуби бош мураббийи Алваро Арбелоа “Бенфика”га қарши жавоб баҳси олдидан матбуот анжуманида ўз фикрларини билдирди. Унинг сўзларидан билинишича, жамоа “Бернабеу”даги ўйинни оддий учрашув эмас, балки катта имтиҳон, ҳатто финалга тенг кеча сифатида қабул қилмоқда.
Арбелоа “Реал”нинг жавоб ўйинидаги режаси ҳам аниқ эканини яширмади: жамоа Лиссабондаги баҳсга ўхшаш услубда майдонга тушишини хоҳлайди.
— “Реал” қандай бўлади? Лиссабондаги ўйинга жуда ўхшаш. Мен шуни хоҳлайман ва шуни кутяпман. Бу алоҳида ўйин, “Бернабеу”даги буюк Чемпионлар лигаси оқшоми бўлади. Мухлислар қўллаб-қувватлаши нақадар муҳимлигини биламиз, — деди у.
Мураббийнинг таъкидлашича, жамоанинг асосий мақсади битта: ғалаба қозониб, кейинги босқичга йўл олиш. Шунинг учун ҳам барча диққат, бутун энергия айнан шу беллашувга йўналтирилган.
— Биз ғалаба қозониб, кейинги босқичга чиқишни ўйлаяпмиз. Ҳиссиётлар жуда кўп. “Бернабеу”даги буюк оқшомдан завқланишни истаймиз. Тикилган нарса жуда катта. Кўпинча “Бу финал”, дейишади. Ҳақиқатан ҳам шундай бўлади. Барча куч ва энергиямиз айнан шу ўйинга қаратилган, — дея қўшимча қилди Арбелоа.
Эслатиб ўтамиз, илк учрашувда “Реал” сафарда “Бенфика”ни 1:0 ҳисобида мағлуб этган эди. Демак, мадридликлар жавоб баҳсига минимал, аммо қимматли устунлик билан чиқади. Аммо Чемпионлар лигасида “бир голлик фарқ” ҳеч қачон хотиржамлик бермайди — шунинг учун “Бернабеу”даги кеча ҳақиқатан ҳам финалдек кайфиятда ўтиши кутиляпти.
“Zamin”ни Telegram'да ўқинг!
