Ўзбекистон миллий терма жамоаси марказий ҳимоячиси Абдуқодир Ҳусанов ўз фаолиятидаги муҳим босқични босиб ўтди — у Европадаги илк йирик совринини қўлга киритди. «Манчестер Сити» таркибида «Уэмбли» стадионида бўлиб ўтган Англия Лига кубоги финалида иштирок этган ҳимоячи жамоасининг 2:0 ҳисобидаги ғалабасига муносиб ҳисса қўшди.
Финалда Ҳусанов тўлиқ 90 дақиқа ҳаракат қилди ва марказий ҳимояда ишончли ўйини билан эътиборга тушди. У рақиб ҳужумчиси Виктор Дьёкерешни деярли бутун учрашув давомида назоратда ушлаб, унинг хавфли вазиятлар яратишига йўл қўймади. Бу эса унинг интизомли ва ҳисоб-китобли ўйин услубини яна бир бор намоён қилди.
Нуфузли манба cityxtra.co.uk сайти финалдаги ўйинчилар ҳаракатини таҳлил қилиб, Ҳусановга 5,5 балл берди. Қайд этилишича, у сўнгги ҳафталардаги барқарор ўйинлари орқали мураббийлар ишончини қозонган ва жароҳат олган Рубен Диаш ҳамда турнирда қатнашмаган Марк Гехи ўрнини муносиб равишда тўлдирган.
Дарвозабон Жеймс Траффорд 7,5 балл билан энг муҳим қаҳрамонлардан бирига айланди — у ўйин бошидаёқ Кай Хаверц ва Букайо Саканинг кетма-кет зарбаларини қайтариб, жамоасини мураккаб вазиятдан олиб чиқди.
Ҳимояда Матеуш Нуньеш (6,5) ва Натан Аке (5,5) ҳам барқарор ўйин намойиш этди. Айниқса, Акенинг ўз вақтидаги подкатлари рақибнинг хавфли ҳужумларини бартараф этди.
Финалнинг ҳақиқий қаҳрамони эса Нико О’Райли бўлди — у 8 балл билан баҳоланди. Иккинчи бўлимда киритган дубли орқали жамоасига ғалаба келтирди ва деярли икки йиллик танаффусдан сўнг «Сити»га навбатдаги совринни тақдим этди.
Майдон марказида Родри (6,5) ва Бернарду Силва (6) ўйинни назорат қилиб, жамоанинг ҳужумга ўтишини ташкил қилди. Қанотларда эса Жереми Доку (6,5) ва Райан Шерки (6) тезкор ҳаракатлари билан рақиб ҳимоясини доимий босим остида ушлаб турди.
Ҳужум чизиғида Антуан Семеньо (7) фаоллиги билан ажралиб турди, Эрлинг Холанд (6) эса рақиб ҳимоячилари диққат марказида бўлиб, жамоадошларига бўш ҳудудлар яратиб берди. Фил Фоден эса ўйин охирида майдонга тушгани сабабли тўлиқ баҳоланмади.
Шу тариқа, Абдуқодир Ҳусанов ўзининг илк катта финалида муносиб иштирок этиб, «Манчестер Сити» билан тарихий совринни қўлга киритди. Бу нафақат унинг шахсий ютуғи, балки ўзбек футболи учун ҳам катта ютуқ. Агар у шу темпда давом этса, бу ҳали фақат бошланиши.
“Zamin”ни Telegram'да ўқинг!
