«Манчестер Сити»нинг бош мураббийи Хосеп Гвардиола мавсум якунида лавозимини тарк этиши мумкинлиги ҳақида хабарлар тарқалмоқда. Испаниялик мутахассис 2016 йилдан бери «шаҳарликлар» жамоасини бошқариб, Премьер-лигада ва Европа аренасида бир қатор катта ютуқларга эришди.
Football Insider нашри маълум қилишича, агар Гвардиола кетадиган бўлса, унинг ўрнига Венсан Компани тайинланиши эҳтимоли юқори. 39 ёшли белгиялик мутахассис 2024 йилдан бери «Бавария» бош мураббийи сифатида фаолият юритиб келмоқда ва мюнхенликлар билан Германия чемпионлиги ҳамда суперкубогини қўлга киритган.
Компани катта профессионал тажриба ва стратегик кўникмаларга эга бўлиб, футболчилар билан ишлашда ҳам нуфузли ҳисобланади. Унинг «Манчестер Сити»даги иши жамоага янги энергия ва тактик имкониятлар олиб келиши мумкин.
Ҳозирча клуб раҳбарияти расмий баёнот бермаган, аммо мухлислар орасида бу янги тайинлов ҳақида турли тахминлар кўп. Агар Компани лавозимни қабул қилса, жамоа келгуси мавсумда ҳам Премьер-лигада ва халқаро мусобақаларда кучли рақиблардан бири бўлиб қолиши кутилмоқда.
“Zamin”ни Telegram'да ўқинг!
