«Манчестер Сити» клуби раҳбарияти ўтган мавсумдаги кутилмаган пасайишдан сўнг бошланган туб ислоҳотларни янги босқичга олиб чиқмоқда. Жамоанинг спорт директори Уго Виана бошчилигида таркибни ёшартириш ва янгилаш жараёни шиддат билан давом этмоқда.
Zamin.uz нашри «шаҳарликлар» лагерида кутилаётган катта «тозалов» ва ўзбек футбол мухлислари учун фахрли бўлган янгиликлар тафсилоти билан бўлишади.
Европа футболида ўз ҳукмронлигини қайта тиклашга интилаётган Пеп Гвардиола келаси мавсум учун таркибни тубдан қайта қуришни мақсад қилган. Чемпионлар лигасидаги муваффақиятсизлик ва «Арсенал» каби рақобатчиларнинг босими «Этихад» эгаларини кескин қарорлар қабул қилишга мажбур этмоқда.
Янги давр қаҳрамонлари
Эътиборли жиҳати шундаки, «Манчестер Сити»даги янгиланишлар занжири 2025 йилнинг январь ойида Абдуқодир Ҳусановнинг келиши билан бошланган эди. Бугунга келиб, ҳамюртимиз билан бирга Жанлуижи Доннарумма, Умар Мармуш ва Тижани Рейндерс каби ижрочилар жамоанинг асосий ўзагига айланиб улгурди.
Бироқ янгиланишлар тўхтаб қолгани йўқ. City Xtra нашрининг хабарига кўра, келаси ёзда нақ 12 нафар футболчи жамоани тарк этиши мумкин.
«Қора рўйхат»: Кимлар кетади?
Жамоа раҳбарияти тажрибали, аммо Пепнинг янги тизимига мос тушмаётган ёки шартномаси якунланаётган футболчилар билан хайрлашишга тайёр:
Мудофаа чизиғи: Шартномаси тугаётган Натан Аке ва клуб афсонаси Жон Стоунз учун «Сити»даги фаолият якунига етаётгандек. «Интер»да ижарада порлаётган Мануэль Аканжи ҳам Италияда қолишни истамоқда. Академия тарбияланувчиси Рико Льюис эса доимий ўйин амалиёти илинжида бошқа клубга ўтиши эҳтимоли юқори.
Ярим ҳимоя ва ҳужум: Жароҳатлар ва рақобат сабабли Матео Ковачич ҳамда Калвин Филлипс жамоа режаларидан чиқиб қолган. Клуб учун энг оғриқли йўқотиш — Бернарду Силванинг кетиши бўлиши мумкин. Португалиялик юлдуз янги чақириқларни қабул қилишга қарор қилган.
Юлдузли «захира»: Жек Грилиш (“Эвертон”да ижарада) ва Жеймс Траффорд каби ўйинчилар ҳам асосий таркибдаги ўринларини янги келганларга бой бериб қўйишган.
Абдуқодир Ҳусанов — «Сити»нинг келажакдаги қўрғони
Ушбу катта ўзгаришлар фонида ўзбекистонлик ҳимоячи Абдуқодир Ҳусановнинг мавқеи тобора мустаҳкамланиб бормоқда. 22 ёшли футболчимиз қисқа фурсат ичида Гвардиоланинг энг ишончли вакилларидан бирига айланди.
Экспертларнинг фикрича, «Манчестер Сити»нинг келажакдаги ҳимоя чизиғи айнан Ҳусанов атрофида шакллантирилади. Унинг барқарор ўйини, совуққонлиги ва тактик жиҳатдан тез мослашуви клуб мутасаддиларини Стоунз ёки Аке каби тажрибали ҳимоячилардан воз кечишга ундаётган асосий омиллардан биридир.
Азиз футбол ишқибозлари, сизнингча, Гвардиоланинг 12 нафар футболчи билан хайрлашиш қарори тўғрими? Абдуқодир Ҳусанов келаси мавсумда «Сити»нинг сардори ёки асосий етакчиси бўла оладими?
“Zamin”ни Telegram'да ўқинг!
