“Реал” раҳбарияти энди Арбелоанинг штабини истъфога чиқарадими?
«Реал Мадрид»нинг сўнгги номуваффақиятлари сабабли бош мураббий Альваро Арбелоанинг келажаги шубҳа остида қолмоқда. Клуб раҳбарияти Чемпионлар лигасидан чиқиб кетиш ва Ла Лигадаги паст натижалар туфайли мавсум якунида штабда ўзгаришлар қилишни кўриб чиқмоқда. Шунга қарамай, мураббийнинг жамоа ичидаги обрўси ва содиқлиги сабабли ҳозирча шошма-шош қарор қабул қилинмайди. Мутахассис тақдири келгуси ойлардаги натижаларга боғлиқ бўлади.
“Реал Мадрид” бош мураббийи Альваро Арбелоа келажаги ноаниқ ҳолатда қолмоқда. The Athletic тарқатган маълумотларга кўра, мутахассис мавсум якунлангач ўз лавозимини тарк этиши мумкин.
Бундай муҳокамаларга жамоанинг сўнгги натижалари сабаб бўлмоқда. Айниқса, Чемпионлар лигаси чорак финалида “Реал”нинг “Бавария”га икки ўйин натижасига кўра 4:6 ҳисобида мағлуб бўлиб, турнирни тарк этгани жиддий таъсир қилди. Шу билан бирга, Ла Лигада ҳам вазият идеал эмас — пойтахт клуби пешқадамдан 9 очко орқада қолмоқда.
Шу ҳолатлар фонида клуб раҳбарияти мураббийлар штабида ўзгаришлар қилиш эҳтимолини жиддий кўриб чиқмоқда. Бироқ манбаларга кўра, ҳозирча шошма-шошар қарор қабул қилинмайди. Яъни, эҳтимолий ўзгаришлар фақат мавсум якунига етгач амалга оширилиши мумкин.
Қайд этилишича, айни пайтда янги мураббий тайинлашдан катта самара кутилмаяпти. Бунинг устига, Арбелоа клубга содиқ ва жамоа ичида ҳурмат қозонган шахс сифатида баҳоланмоқда. Унинг энг катта ютуқларидан бири — жамоа ичидаги муҳитни яхшилаганидир.
Мана шу омиллар туфайли клуб раҳбарияти май ойига қадар барқарор ва профессионал атмосферани сақлаб қолишни мақсад қилган. Демак, ҳозирча Арбелоа ўз вазифасини давом эттиради.
Эслатиб ўтамиз, испаниялик мутахассис 2026 йил январ ойида “Реал” бош мураббийи сифатида таништирилган. Унинг амалдаги шартномаси 2027 йил ёзига қадар мўлжалланган.
Қисқаси, барча нарса мавсум якунига боғлиқ. Арбелоа учун олдинда ҳал қилувчи ойлар турибди — натижалар унинг тақдирини белгилаб беради.
Изоҳлар 0
…