"Манчестер Сити" яримҳимоячиси Бернарду Силва мавсум якунлангач клубни тарк этишини маълум қилди ва мухлисларга самимий мурожаат йўллади.
У ўз нутқида “шаҳарликлар” сафида ўтган тўққиз йилни ҳаётининг энг муҳим даври сифатида эслади. Унинг айтишича, клуб унга орзу қилганидан ҳам катта ютуқлар ва хотиралар берган:
- “Шаҳарликлар”! Бу ерга тўққиз йил аввал келганимда, ҳаётда муваффақият қозониш, катта ишлар қилиш каби кичик боланинг орзусига эргашган эдим. Бу шаҳар ва бу клуб менга бундан ҳам кўпроқ нарса берди. Ҳатто орзу қилишга журъат этганимдан ҳам кўпроқ", - деб ёзди Силва.
Силва ушбу даврда қўлга киритилган натижаларни санаб ўтди: 100 очколик мавсум, ички квадрупл, Чемпионлар Лигаси триумфи ва кетма-кет тўртта чемпионлик каби тарихий ютуқлар унинг фаолиятида муҳим ўрин тутади:
- “Биз бирга қўлга киритган ютуқларимиз — бу юрагимда абадий қоладиган мерос. Юз очколик мавсум, ички квадрупл, требл, кетма-кет тўрт чемпионлик ва яна кўплаб ютуқлар… Ёмон чиқмади", - деб ёзди Силва.
Футболчи шунингдек, Манчестер шаҳрида оила қурганини ва бу ер унинг иккинчи уйига айланганини таъкидлади. У ҳаётидаги муҳим инсонлар — оиласига ҳам алоҳида миннатдорлик билдирди:
- “Бир неча ойдан сўнг мен нафақат клуб сифатида шунча ғалабаларга эришган, балки мен оилавий ҳаётимни бошлаган ва оила қурган шаҳар билан хайрлашиш вақти келади. Чин юракдан — Инес ва Карлота, сизларга раҳмат!
Мухлисларга: сизларнинг бу йиллар давомидаги беқиёс қўллаб-қувватлашингиз — мен ҳеч қачон унутмайдиган нарса. Футболчи сифатидаги асосий мақсадим ҳар доим майдонга иштиёқ билан чиқиш, сизлар бизнинг орқамиздан фахрланишингиз ва майдонда манфаатларингиз муносиб ҳимоя қилинаётганини ҳис қилишингиз эди. Умид қиламанки, ҳар бир ўйинда шуни ҳис қилгансиз", - деб ёзди Силва.
Пеп Гвардиола ва бутун клуб ходимларига ҳамда жамоадошларига миннатдорлик билдирган Силва, базадаги муҳит унга оиладек туйилганини айтди:
- “Клубга, Пепга, барча ходимларга ва шу тўққиз йил давомида бирга бўлган жамоадошларимга — барча хотиралар ва менга бу йўлнинг бир қисми бўлиш имконини берганингиз учун раҳмат.
Машғулот базасида ҳар куни яратган муҳитимиз менга ўзимни уйдагидек ҳис қилишимга — катта бир оиланинг бир қисми эканимни англашимга ёрдам берди", - деб ёзди Силва.
У мухлисларга ҳам алоҳида тўхталиб, уларнинг қўллаб-қувватлови унга ҳар доим куч берганини қайд этди. Унинг сўзларига кўра, майдонда ҳар сафар клуб шаънини ҳимоя қилиш унинг асосий мақсади бўлган:
- “Келинг, бу сўнгги ҳафталардан биргаликда завқланайлик ва мавсум бизга яна нималар бериши мумкин бўлса, барчаси учун курашайлик", - деб ёзди Силва ижтимоий тармоқда.
Силва клубни тарк этса-да, “Манчестер Сити”нинг умрбод мухлиси бўлиб қолишини таъкидлади. У жамоага ишонч билдириб, келажакда яна кўплаб совринлар кутилaётганини айтди:
- “Мен клубга “Манчестер Сити” ўйинчиси сифатида келганман, аммо кетар эканман — умрбод “Манчестер Сити” мухлиси бўлиб қоламан. Бу ёш жамоани қўллаб-қувватлашда давом этинг, ишонаманки, келажакда у сизларга яна кўплаб ажойиб хотиралар тақдим этади", - деб ёзди Силва ижтимоий тармоқда.
Ҳозир эса футболчи мавсумнинг сўнгги ҳафталарини тўлиқ куч билан ўтказишга ва жамоа билан бирга яна ғалабалар учун курашишга тайёр эканини билдирмоқда.
