Гвардиола: “Арсенал” устидан ғалаба умидни яна қайтарди
"Манчестер Сити" бош мураббийи Пеп Гвардиола "Арсенал" устидан қозонилган ғалабадан мамнун эканини, аммо чемпионлик пойгаси ҳали тугамаганини таъкидлади. Унинг сўзларига кўра, жамоа ҳозирча турнир жадвалида пешқадам бўлмаса-да, бу натижа умидни қайта тирилтирди ва ишонч бағишлади. Гвардиола босқичма-босқич олдинга интилаётганларини ва мавсум охиригача курашиш имконияти борлигига ишонч билдирди. Мураббийнинг фикрича, энг асосийси — умид сақланиб қолмоқда ва жамоа сўнгги турларга қадар интригани сақлаб қолишга тайёр.
Англия Премьер-лигасида “Манчестер Сити”нинг “Арсенал” устидан қозонган муҳим ғалабасидан сўнг жамоа бош мураббийи Пеп Гвардиола учрашув ҳақида ўз мулоҳазаларини билдирди. Испаниялик мутахассис натижадан қониққанини яширмади, аммо ҳали чемпионлик пойгасида барча масала ҳал бўлмаганини алоҳида таъкидлади.
— Ҳа, бугунги натижадан мамнун бўлиш мумкин. Лекин реал ҳолат шундайки, биз ҳозирча турнир жадвалида пешқадам эмасмиз. Шунингдек, тўплар фарқи бўйича ҳам устунлик рақиб томонида, — деди Гвардиола.
Унинг таъкидлашича, жамоа босқичма-босқич олдинга ҳаракат қилмоқда ва чемпионлик учун курашни давом эттириш имконияти сақланиб қолган.
— Биз секин-аста олдинга интилаяпмиз. Мавсум охиригача курашиш имконияти бор ва биз бунга ишонамиз. Ҳали ҳам ўйин ичидамиз, — дея қўшимча қилди у.
Гвардиола вазиятни ҳаддан ташқари идеаллаштирмаслик кераклигини ҳам қайд этиб, ҳозирги ҳолатни “завқланиш” деб баҳолаш тўғри эмаслигини айтди.
— “Биз завқ оляпмиз” дейиш унчалик тўғри эмас, аммо вазиятни ёмон деб ҳам бўлмайди. Энг асосийси — умид сақланиб қолмоқда, — деди мураббий.
Унинг фикрича, айнан “Арсенал”га қарши ўйин жамоага ишонч ва руҳий кўтаринкилик бахш этган.
— Бугунги баҳс бизга айнан шу — ишонч ва умидни берди, — дея хулоса қилди Гвардиола.
Қисқаси, “Манчестер Сити” ҳали чемпионлик пойгасидан чиққанича йўқ. Гвардиола шогирдлари эса сўнгги турларга қадар интригани сақлаб қолишга бел боғлаган.
Изоҳлар 0
…