Перес Алонсони кетказиш ва Арбелоа қарорида хато қилганини тан олди
"Реал Мадрид" президенти Флорентино Перес жамоа бош мураббийларини алмаштириш борасидаги қарорларида хатога йўл қўйганини тан олди. Унинг фикрича, Хаби Алонсони истеъфога чиқариш вақти нотўғри танланган, бу эса кейинги жараёнларга салбий таъсир қилган. Альваро Арбелоанинг вазифаси қийинлашгани ва унинг ўзи ҳам келаси мавсумда бош мураббий сифатида қолдирилмаслиги айтилмоқда. Перес жамоага юқори натижалар учун топ даражадаги мураббий кераклигини таъкидлади.
“Реал” клуби президенти Флорентино Перес жамоа бош мураббийи лавозимидаги ўзгаришлар юзасидан қарорларида хато бўлганини тан олгани ҳақида маълумотлар пайдо бўлди. Унинг фикрича, мураббий алмашинуви тўғри вақтда амалга ошмаган ва бу кейинги жараёнларга салбий таъсир кўрсатган.
Хаби Алонсо 12 январь куни Испания Суперкубоги финалида “Барселона”га 2:3 ҳисобидаги мағлубиятдан кейин жамоани тарк этган эди. Унинг ўрнини эса Альваро Арбелоа эгаллаган.
“ABC” нашри маълумотларига кўра, Перес Алонсони аввалроқ, яъни декабрь бошидаёқ “Сельта”га қарши 1:2 мағлубиятдан сўнг истеъфога чиқармоқчи бўлган. Аммо клуб бош директори Хосе Анхель Санчес бу қарорни шошилинч қабул қилмасликни тавсия қилган. Натижада кечикиш юзага келган ва бу Арбелоанинг ишини янада оғирлаштирган.
Перес Арбелоа меҳнатини қадрлашини, унга ҳурмат билан муносабатда бўлишини таъкидламоқда, бироқ уни келаси мавсумда ҳам бош мураббий сифатида қолдириш режада йўқ. Унинг фикрича, на Алонсо, на Арбелоа жамоадан кутилган юқори даражадаги натижани бера олмаган.
Клуб раҳбари жамоа сўнгги икки мавсумга қараганда яхшироқ ўйнаётганини тан олса-да, ҳақиқий сакраш учун топ даражадаги мураббий керак, деб ҳисобламоқда. Шу сабаб ёзги трансферлар билан бирга мураббий масаласи ҳам чуқур таҳлил қилиниши кутилмоқда.
Шу билан бирга, таркибда катта инқилоб режалаштирилмаяпти. Асосий эътибор марказ ва ўнг қанот ҳимояси, шунингдек ярим ҳимоя чизиғини кучайтиришга қаратилган.
“Реал” айни пайтда келажак учун бир қатор трансфер вариантларини ҳам кўриб чиқмоқда. Жумладан, “Комо”дан Нико Пас ва “Осасуна”дан Виктор Муньосни қайтариш имконияти ўрганилмоқда. “Лион”да ижарада ўйнаётган Эндрикнинг ҳам қайтиши режада бор.
Айрим ёш футболчилар, жумладан Франко Мастантуоно ижарага юборилиши мумкин, Гонсало Гарсия эса қайта сотиб олиш шарти билан сотилиши эҳтимол қилинмоқда.
Ҳозирда “Реал” Ла Лигада 32 турдан сўнг 73 очко тўплаб, иккинчи ўринда бормоқда. Жамоа “Барселона”дан 6 очко ортда, бироқ каталонияликлар бир ўйини кам ўтказган.
Изоҳлар 0
…