Левандовски «Барселона»дан эркин агент сифатида кетишга тайёрланмоқда
Майкл Оуэн «Барселона»ни эркин агент сифатида тарк этиши кутилаётган Роберт Левандовскининг «Ливерпуль»га ўтиши мантиқсиз эканини таъкидлади. Собиқ футболчининг фикрича, жамоадаги мавжуд муаммоларга қарамай, таркиб мувозанатини сақлаш учун яна бир марказий ҳужумчидан кўра бошқа позицияларни кучайтириш муҳимроқдир. Ҳозирда 38 ёшга яқинлашаётган польшалик тўпурарга асосан Саудия Арабистони ва АҚШ клубларидан қизиқиш билдирилмоқда. Шу сабабли, тажрибали ҳужумчининг Англия Премьер лигасида дебют қилиш эҳтимоли жуда паст баҳоланмоқда.
«Ливерпуль» жамоасининг собиқ ҳужумчиси Майкл Оуэн нима учун Роберт Левандовски «Энфилд» учун мос вариант эмаслигини тушунтирди. Гарчи «Барселона» билан хайрлашишга тайёрланаётган польшалик ҳужумчи эркин агент сифатида таклиф этилаётган бўлса-да, Оуэн бу трансферни мантиқсиз деб ҳисобламоқда. Унинг фикрича, жамоада ҳужум чизиғи билан боғлиқ муаммолар бўлишига қарамай, бошқа позицияларни кучайтириш муҳимроқ. Бу ҳақда Goal.com хабар беради.
Ҳозирда «Ливерпуль» таркибида жиддий йўқотишлар мавжуд: Уго Экитике Ахилл пайи узилгани сабабли камида тўққиз ойга сафдан чиқди. Шунингдек, жамоанинг асосий юлдузи Муҳаммад Салаҳ ёзда клубни тарк этиши кутилмоқда. Швециялик ҳужумчи Александер Исак эса жароҳатдан сўнг ўз спорт формасини тиклашга қийналмоқда ва 20 та ўйинда бор-йўғи 3 та гол уришга муваффақ бўлди.
Оуеннинг таъкидлашича, Левандовски каби тажрибали футболчи захира ўриндиғида ўтиришга рози бўлмайди. «Мен Левандовскининг бу ролга рози бўлишига ишонмайман. Жамоада аллақачон Исак ва Экитике бор, таркиб эса бироз мувозанатни йўқотган. Яна бир марказий ҳужумчини олиб келиш вазиятни янада ёмонлаштиради», — дея қўшимча қилди собиқ футболчи.
Маълумотларга кўра, 38 ёшга яқинлашаётган Левандовски учун Саудия Арабистони ва АҚШ клубларидан чорловлар бор. «Ливерпуль» эса Салаҳнинг ўрнини босадиган қанот ҳужумчиси қидиришга кўпроқ эътибор қаратиши кутилмоқда. Шу сабабли, польшалик тўпурарнинг Англия Премьер лигасида дебют қилиши эҳтимоли жуда паст баҳоланмоқда.
Изоҳлар 0
…