«Ливерпуль» бош мураббийи Арне Слот ҳужумчи Уго Экитикенинг Ахиллес пайи узилгани сабабли муваффақиятли операция қилинганини тасдиқлади. Франциялик футболчи Европа мусобақалари доирасида ўзининг собиқ жамоаси «PSJ»га қарши баҳсда оғир жароҳат олган эди. Тиббий кўриклар натижасига кўра, ҳужумчи камида тўққиз ой давомида майдонга туша олмайди. Бу ҳақда Goal.com хабар беради.
Ушбу жароҳат Экитикени нафақат жорий мавсумнинг қолган қисмидан, балки 2026 йилги Жаҳон чемпионатидан ҳам маҳрум қилди. Шунингдек, у келаси мавсумнинг катта қисмини ўтказиб юбориши кутилмоқда. Мураббий Слотнинг таъкидлашича, операция яхши ўтган бўлса-да, тўлиқ тикланиш учун узоқ ва машаққатли йўлни босиб ўтиш талаб этилади.
«Операция муваффақиятли якунланди, бироқ бундай узоқ реабилитация жараёнида кўплаб босқичларни босиб ўтиш керак. Мутахассислар буни бир неча ой давом этишини айтишмоқда. У худди узоқ вақт сафдан чиққан бошқа ўйинчилар каби янада кучли бўлиб қайтади», — деди Арне Слот матбуот анжуманида.
Ҳозирда «Ливерпуль» таркибида жароҳатлар билан боғлиқ вазият мураккаблашмоқда. Дарвозабон Гиорги Мамардашвили тиззасидан жароҳат олган бўлса, Алиссон Беккерда мушаклар билан боғлиқ муаммолар кузатилмоқда. Жамоа шанба куни «Кристал Пэлас»га қарши ўйинда дарвозага Фредди Вудманни қўйишга мажбур бўлиши мумкин.
Англия чемпионатида бешинчи ўринда бораётган «Ливерпуль» учун Европа Чемпионлар лигаси йўлланмасини қўлга киритиш муҳим вазифа бўлиб қолмоқда. Жамоа айни пайтда «Брайтон»дан беш очко олдинда ва захира ўйинига эга. Таркибдаги йўқотишларга қарамай, Слот шогирдлари мавсум якунини муваффақиятли якунлашга ҳаракат қилади.
“Zamin”ни Telegram'да ўқинг!
