"Бунёдкор" — "Андижон" (1:3) учрашувидан кейин ташкил этилган матбуот анжуманида дастлаб меҳмонлар жамоаси бош мураббийи Ислом Аҳмедов журналистларнинг саволларига батафсил жавоб қайтарди. Мутахассис, аввало, жамоани доим қўллаб-қувватлаб келаётган мухлисларга, шунингдек ҳудуд раҳбарияти ва клуб атрофидаги барча инсонларга миннатдорчилик билдирди.
Унинг таъкидлашича, ўйинга жиддий тайёргарлик кўрилган ва рақибнинг ўйин услуби пухта ўрганилган. “Биз Бунёдкорни ўз услубига эга, салоҳиятли мураббий бошқараётган жамоа сифатида яхши билардик. Шу сабабли режа асосида ҳаракат қилдик ва айтиш мумкинки, у ўзини тўлиқ оқлади”, — деди Ислом Аҳмедов.
Матбуот анжумани давомида кўпчиликни ҳайратга солган ҳолат — биринчи бўлимдан сўнг бир вақтнинг ўзида тўрт нафар футболчининг алмаштирилгани ҳақида ҳам сўралди. Мураббий бу қарорни тактик эҳтиёж билан изоҳлади. Унинг сўзларига кўра, рақибга босим ўтказиш учун олдинги чизиқда катта юклама юзага келган ва биринчи таймнинг ўзидаёқ айрим ўйинчиларда чарчоқ аломатлари сезилган. Шу боис иккинчи бўлимда янги кучлар майдонга туширилиб, ўйин темпи сақлаб қолинган.
Шунингдек, қишки трансферда жамоага келиб қўшилган Мартин Боакенинг ўйини ҳақида ҳам фикр билдирилди. Мураббий унинг салоҳияти юқори эканини таъкидлаб, айниқса ҳаводаги курашларда устун эканини қайд этди. “Биз унинг кучли томонларидан максимал даражада фойдаланишга ҳаракат қиляпмиз. У тўпни яхши сақлайди ва рақиб ҳимоячиларини ўзига жалб қила олади”, — дея қўшимча қилди мутахассис.
Рақиб билан боғлиқ статистик маълумотларга келсак, Ислом Аҳмедов бу омилга катта аҳамият бермаганини очиқ айтди. Унинг фикрича, асосий эътибор тайёргарлик ва рақибни ўрганишга қаратилган. Жамоа айнан шу жиҳат орқали рақибнинг устунликларини чеклашга эришган.
Ёш футболчилар масаласи ҳам муҳокама қилинди. Хусусан, Бекзод Сулаймоновга берилган имконият ва U21 жамоасида тўпурар бўлиб турган Хамидулло Каримов ҳақида саволлар берилди. Мураббий ёшларга ишонч билдириб, уларни босқичма-босқич асосий жамоага жалб қилиш режада борлигини таъкидлади. “Ёшларимиз орасида иқтидорли футболчилар кўп. Улар бежиз юқори ўринларда юришмаяпти”, — деди у.
Ғалабанинг руҳий жиҳатдан аҳамияти ҳақида тўхталар экан, мутахассис бу натижа бутун жамоага катта ишонч бағишлаганини билдирди. Қатор мағлубиятлардан кейин футболчиларда тушкунлик пайдо бўлгани, шу сабабли машғулотларда ички рақобатни ошириш ва руҳий тайёргарликка алоҳида эътибор қаратилгани айтилди. “Бугунги ғалаба бизга янада кўпроқ ишонч беради. Ўйиндан ўйинга ўсишда давом этамиз”, — дея фикрини якунлади у.
Шунингдек, ўринбосарлар таркибида ўйнаб келаётган айрим футболчилар — Азимов, Ғуломов ва Комилов ҳақида ҳам режалар мавжудлиги билдирилди. Уларнинг барчаси асосий жамоа билан машғулот ўтказаётгани, яқин келажакда уларга ҳам имконият берилиши мумкинлиги таъкидланди.
Қисқача айтганда, "Андижон" бу ғалаба орқали нафақат уч очкони қўлга киритди, балки жамоадаги ишонч ва муҳитни ҳам сезиларли даражада яхшилаб олди. Энди эса улар олдидаги асосий вазифа — шу барқарорликни сақлаб қолиш.
“Zamin”ни Telegram'да ўқинг!
