Ўзбекистон Суперлигасининг 10-турида "Андижон" ўз майдонида "Динамо" Самарқандни 2:1 ҳисобида мағлуб этганидан сўнг матбуот анжуманининг иккинчи қисмида жамоа бош мураббийи Ислом Аҳмедов иштирок этди. Мутахассис қийин кечган баҳс, тактик қарорлар ва жамоадаги муҳит ҳақида батафсил тўхталиб ўтди.
Аҳмедов, аввало, ғалаба осонликча қўлга киритилмаганини таъкидлаб, рақиб жамоанинг салоҳиятига юқори баҳо берди:
«Бугунги натижа билан барча мухлисларимизни, вилоят раҳбариятини табриклайман. “Динамо”да яхши танланган футболчилар бор, тажрибали мураббий ишлаяпти. Ўйин қийин кечишини билгандик. Йигитларимиз характер кўрсатиб, иккинчи бўлимда натижани ўзгартира олди», — деди у.
Мураббий жамоадаги ҳар бир инсоннинг ҳиссасини алоҳида қайд этди. Унинг сўзларига кўра, ғалабалар фақат футболчилар эмас, балки ортида турган барча ходимлар меҳнати самарасидир.
Тактик масалага тўхталар экан, Аҳмедов жамоа рақибга мослашишдан кўра ўз услубини шакллантиришга урғу бераётганини айтди. Ички рақобат кучайтирилган ва ким яхши формада бўлса, ўша майдонга тушмоқда. Бу ёндашув ўз самарасини бераётгани қайд этилди.
Захирадан тушган футболчиларнинг ҳал қилувчи рол ўйнагани ҳақидаги саволга мураббий алоҳида эътибор қаратди:
«Биз уларга сенлар ҳам асосий таркиб футболчисисан деб ишонч берамиз. Иккинчи бўлимда ўйинни кучайтиришлари кераклигини тушунтирамиз. Шунинг учун майдонга чиққан ҳар бир футболчи борини беряпти», — деди у.
Ўйин давомидаги қийинчиликларга келсак, мураббий футболчиларда бироз толиқиш кузатилганини тан олди. Шу билан бирга, биринчи бўлимда босим туфайли жамоа оддийроқ ўйнашга ҳаракат қилган. Танаффусда эса футболчиларга эркин ҳаракат қилиш ва хато қилишдан қўрқмаслик кераклиги айтилган.
Майдон ҳолатига ҳам тўхталган Аҳмедов бу ҳолат улар учун ҳам кутилмаган бўлганини билдирди. Чунки жамоа асосан тўп назорати ва паслар орқали ўйнашга мослашган.
Шунингдек, айрим футболчиларнинг ҳолати ҳақида ҳам маълумот берилди. Голбан жароҳатдан тикланиш жараёнида экани, Болтабоев эса яхши ҳолатда экани айтилди.
Мураббий мухлислар таъсирига ҳам алоҳида урғу берди:
«Бундай мухлислари бор жамоа доим ғалаба қозониши керак. Босим бор, лекин бу босим бизга куч ҳам беради. Иккинчи бўлимда мухлислар қўллаб-қувватлаган сари жамоа янада руҳланди», — деди Аҳмедов.
Қисқаси, “Андижон” бу ўйинда нафақат тактика, балки характер ва жамоавийлик ҳисобига ғалабага эришди. Жамоадаги ички муҳит ва ишонч эса натижаларда ўз аксини бермоқда.
“Zamin”ни Telegram'да ўқинг!
