Мбеумо саккизта ўйиндан бери гол ура олмаяпти
«Манчестер Юнайтед» ҳужумчиси Брайан Мбеумо кетма-кет саккизта ўйиндан бери гол ура олмагани сабабли жиддий танқидлар остида қолди. Мавсум бошида сермаҳсул ўйин кўрсатган футболчининг самарадорлиги мураббий алмашинуви ва янги тактик тизим туфайли пасайиб кетгани айтилмоқда. Ҳозирда мухлислар ва экспертлар икки ойдан бери натижа кўрсата олмаётган форвардни асосий таркибдан четлатишни талаб қилмоқда. Агар камерунлик футболчи тез орада ўз формасини тикламаса, жамоадаги ўрнини Бенжамин Шескога бой бериб қўйиши ва муваффақиятсиз трансферга айланиши хавфи мавжуд.
«Манчестер Юнайтед» ҳужумчиси Брайан Мбеумо сўнгги ўйинлардаги самарадорлиги пасайиб кетгани сабабли жиддий танқидлар марказида қолди. Мавсум бошида 71 миллион фунт стерлинг эвазига трансфер қилинган футболчи дастлабки ойларда ажойиб ўйин кўрсатган эди. Бироқ ҳозирда камерунлик форвард кетма-кет саккизта учрашувдан буён рақиблар дарвозасини ишғол қила олмаяпти. У сўнгги бор 7 февраль куни «Тоттенхэм»га қарши баҳсда гол урган эди. Бу ҳақда Goal.com хабар беради.
Мбеумо жорий мавсумда Премьер-лигада 9 та гол билан жамоасининг энг яхши тўпурари бўлиб турибди, аммо унинг умумий ҳиссаси сезиларли даражада камайган. Икки ойдан бери на гол, на ассист қайд этган ҳужумчи душанба куни ўзининг собиқ жамоаси «Брентфорд»га қарши майдонга тушишга тайёрланмоқда. Мухлислар ва экспертлар бош мураббий Майкл Керрикдан уни асосий таркибдан тушириб қолдиришни талаб қилмоқда.
Футболчининг формасига Рубен Аморимнинг истеъфоси ва Африка Миллатлар Кубогига кетгани салбий таъсир кўрсатган бўлиши мумкин. Аморим қўл остида у ҳужумкор ярим ҳимоячи сифатида порлаган бўлса, Кэррик тизимида марказий ҳужумчи вазифасини бажармоқда. Айни пайтда жамоанинг бошқа бир янги аъзоси Бенжамин Шеско голлар сони бўйича Мбеумога етиб олди. Агар камерунлик футболчи мавсум якунига қадар ўз ўйинини топа олмаса, у ўтган йили муваффақиятсизликка учраган Расмус Хожлунднинг йўлидан кетиши хавфи мавжуд.
Изоҳлар 0
…