Англия Премьер-лигасида чемпионлик учун кураш энг қизғин босқичга кирди. "Арсенал" ва "Манчестер Сити" ўртасидаги рақобат энди қолган ўйинлар тақвими орқали ҳал бўлиши мумкин.
Кеча «Арсенал» «Ньюкасл»ни 1:0 ҳисобида мағлуб этишга муваффақ бўлди ва қимматли уч очкони ўз ҳисобига ёзиб қўйди. «Арсенал»ни олдинда жуда муҳим ва мураккаб баҳслар кутмоқда. Лондонликлар навбатда «Фулҳэм», «Вест Хэм», «Бернли» ва «Кристал Пэлас»га қарши майдонга тушади. Бу ўйинлар орасида сафар учрашувларининг кўплиги жамоага қўшимча босим юклаши аниқ.
Микел Артета жамоаси учун асосий вазифа — барқарорликни сақлаш ва ҳар бир имкониятдан максимал фойдаланиш. Чунки мавсум якунида ҳатто бир очко ҳам ҳал қилувчи бўлиши мумкин.
Бироқ «Манчестер Сити»нинг тақвими ҳам осон эмас. “Шаҳарликлар” «Эвертон», «Брентфорд», «Борнмут», «Кристал Пэлас» ва «Астон Вилла»га қарши баҳс олиб боради. Ҳар бир учрашув финал даражасида аҳамиятга эга.
Эрлинг Холанд етакчилигидаги жамоа тажриба ва сифат жиҳатидан устун кўрилса-да, зич тақвим ва босим улар учун ҳам жиддий синов бўлади.
Қисқача айтганда, чемпионлик энди нафақат майдондаги ўйинга, балки руҳий тайёргарлик, тактик қарорлар ва захира имкониятларига ҳам боғлиқ. Олдиндаги турлар барча саволларга жавоб беради: «Арсенал» орзусига етадими ёки «Манчестер Сити» яна чемпионликни қўлга киритадими?
“Zamin”ни Telegram'да ўқинг!
