Тошкентда UzChess Cup: жаҳон юлдузлари шахматга жамланади
Тошкентда 6–16 июнь кунлари мукофот жамғармаси 121 500 долларни ташкил этувчи III халқаро «UzChess Cup» турнири бўлиб ўтади. Мусобақада Ян Непомняший, Нодирбек Абдусатторов ва Аржун Эригайси каби дунёнинг энг кучли гроссмейстерлари иштирок этиши тасдиқланган. Турнир тўртта йўналишда ташкил этилиб, тажрибали шахматчилар билан бир қаторда ёш истеъдодларга ҳам ўз маҳоратини намойиш этиш имконини беради. Ушбу нуфузли тадбир пойтахтимизни яна бир бор жаҳон шахмати марказига айлантириб, мухлисларга ҳақиқий стратегия жангларини тақдим этади.
Тошкент шаҳри яна бир бор жаҳон шахмати марказига айланиш арафасида. Жорий йилнинг 6–16 июн кунлари пойтахтимизда III халқаро «UzChess Cup» турнири бўлиб ўтади ва у дунёнинг энг кучли гроссмейстерлари ҳамда истиқболли ёш истеъдодларни бир майдонга жамлайди.
Мусобақанинг умумий мукофот жамғармаси 121 500 АҚШ долларини ташкил этади. Бу эса турнир нуфузини янада оширмоқда. Энг қизиқ жиҳатлардан бири — ҳар бир гуруҳ ғолиби кейинги йилги «UzChess Cup»нинг янада юқори босқичида иштирок этиш имкониятини қўлга киритади.
Турнир Masters, Challengers, Futures ва Open гуруҳларида ташкил этилади. Бу формат тажрибали гроссмейстерлар ва янги авлод шахматчиларининг бир вақтда рақобат қилишига шароит яратади.
Айни пайтгача иштирок этиши тасдиқланган юлдузлар рўйхати ҳам мухлисларда катта қизиқиш уйғотмоқда. Улар орасида Ян Непомняший, Нодирбек Абдусатторов, Аржун Эригайси, Жавоҳир Синдоров, Ханс Ниманн, Шахрияр Мамедьяров, Видит Гужрати, Нодирбек Якуббоев, Шамсиддин Воҳидов ва Николас Теодору каби машҳур номлар бор.
Қисқача айтганда, «UzChess Cup» нафақат мусобақа, балки ҳақиқий шахмат шоуга айланмоқда. Тошкентда яна бир бор ақл, стратегия ва ирода жанглари гувоҳи бўламиз.
Изоҳлар 0
…