Европа Чемпионлар лигаси ярим финалининг дастлабки учрашуви доирасидаги «PSJ» ва «Бавария» жамоалари ўртасидаги баҳсни бошқарадиган ҳакамлар бригадаси маълум бўлди. УЕФА ушбу масъулиятли ўйинни швейтсариялик Сандро Шерерга ишониб топширди. Бу ҳақда Goal.com хабар беради.
Винсент Компани бошчилигидаги «Бавария» Париждаги «Парк де Пренс» стадионида 2020 йилдан буён илк бор финал йўлланмасини қўлга киритиш учун майдонга тушади. Бироқ Шерернинг тайинланиши Мюнхен клуби мухлисларида бироз хавотир уйғотмоқда.
Шерер фаолияти давомида «Бавария» иштирокидаги икки ўйинни бошқарган. Агар 2020/21 йилги мавсумда «Локомотив» устидан қозонилган 2:0 ҳисобидаги ғалаба ижобий хотира бўлса, ўтган мавсумдаги ҳолат бошқача кечган.
Ўтган йили чорак финалда «Интер»га қарши ўз уйида 1:2 ҳисобида имкониятни бой берган мюнхенликлар айнан Шерер ҳакамлигида ўйнашган эди. Ўшанда ҳакамнинг ҳаракатларида хато бўлмаса-да, натижа немис клубининг мусобақадан чиқиб кетишига zamin яратган.
Шу билан бирга, «Боруссия Дортмунд» ушбу ҳакам бошчилигида «Лилл» устидан 2:1 ҳисобида ғалаба қозониб, кейинги босқичга ўтган эди. Ўшанда француз клуби президенти Оливье Летанг ҳакамни фақат немис тилида гаплашганликда айблаб, норозилик билдирган.
Ҳозирда 37 ёшда бўлган Сандро Шерер ўзининг футболчилик ўтмиши ҳақида гапирар экан, майдонда жуда мураккаб характерга эга бўлганини тан олади. У ўзини «исёнкор» ва «бошқариш қийин бўлган» ўйинчи деб таърифлаган.
“Zamin”ни Telegram'да ўқинг!
