20–26 апрель кунлари Бразилиянинг Фоз де Игуасу шаҳрида World Boxing кубогининг биринчи босқичи бўлиб ўтди. Нуфузли мусобақада 49 давлатдан 400 нафар спортчи ғолиблик учун рингга кўтарилди.
Ўзбекистон терма жамоаси ушбу босқичда 4 нафар боксчи билан иштирок этди ва қисқа таркибга қарамай, муносиб натижа қайд этди. Ваколатли жамоамиз 2 та олтин ва 1 та бронза медали билан мусобақани якунлаб, ўз салоҳиятини яна бир бор намоён қилди.
Олтин медал соҳибалари сифатида -48 кг вазнда Фарзона Фозилова ва -65 кг тоифада Навбаҳор Ҳамидова рақибларини ортда қолдириб, чемпионликни қўлга киритишди. Улар ҳал қилувчи жангларда ишончли ҳаракат қилиб, юқори даражадаги маҳорат намойиш этди.
Бронза медали эса +90 кг вазн тоифасида Жаҳонгир Зокиров ҳисобига ёзилди. У ҳам мусобақа давомида кучли рақобат шароитида муносиб иштирок этди.
Жамоанинг муваффақиятида мураббий Элшод Расуловнинг ҳиссаси катта бўлди. Шунингдек, мусобақада ҳакам сифатида қатнашган Маруф Урдушев ҳам мамлакатимиз шарафини муносиб ҳимоя қилди.
Қисқача айтганда, “кам таркиб — лекин максимум натижа”. Бу натижа келажакда яна катта ғалабаларга замин яратиши аниқ.
“Zamin”ни Telegram'да ўқинг!
