«Ман Сити» бош мураббийи Пеп Гвардиола «Ливерпуль» юлдузи Муҳаммад Салахнинг футболдаги меросини юқори баҳолади. Мураббий мисрлик ҳужумчини нафақат мерсисайдликлар, балки бутун Англия Премьер-лигасининг ҳақиқий афсонаси деб ҳисоблайди. Бу ҳақда Goal.com хабар беради.
Салах тўққиз йиллик фаолиятидан сўнг жорий мавсум якунида «Энфилд»ни тарк этиши кутилмоқда. Гвардиола Англия кубоги чорак финали доирасидаги ўйин олдидан ўтказилган матбуот анжуманида футболчининг барқарор ўйини ва статистик кўрсаткичларига алоҳида тўхталиб ўтди.
«Салах — буюк ўйинчилардан бири. У нафақат ажойиб футболчи, балки жуда яхши инсон ҳамдир.
Унинг голлари ва ассистлари, эришган барча ютуқлари уни афсонага айлантирди», — деди Гвардиола. Шунингдек, мураббий Салах футбол олами ва Англия учун қилган хизматлари эвазига муносиб тарзда кузатиб қўйилишга лойиқлигини таъкидлади.
Суҳбат давомида Пеп Гвардиола ўз шогирди Фил Фоден ҳақида ҳам фикр билдирди. Мураббий 25 ёшли футболчининг ҳозирги ҳолатидан хавотирда эмаслигини ва у тез орада ўзининг энг яхши формасига қайтишига ишонишини айтди.
Фоден жорий мавсумда 41 та ўйинда 10 та гол уришга муваффақ бўлди. Гвардиоланинг сўзларига кўра, ҳар бир футболчининг фаолиятида пасайишлар бўлиши табиий ҳолат.
Фоден аллақачон олти марта Премьер-лига ғолиби бўлган ва унинг жамоага қўшган ҳиссаси беқиёсдир.
“Zamin”ни Telegram'да ўқинг!
