«Ливерпуль» сардори Виржил ван Дейк Европа Чемпионлар лигаси чорак финали доирасида «PSJ»га қарши бўладиган жавоб учрашуви олдидан жамоасининг имкониятларини очиқчасига баҳолади. Голландиялик ҳимоячи «Энфилд»даги баҳсда ярим финалга чиқиш учун катта ҳажмдаги иш бажарилиши кераклигини таъкидлади. Бу ҳақда Goal.com хабар беради.
Франциядаги биринчи ўйинда 0:2 ҳисобида мағлуб бўлган Арне Слот шогирдлари ўз майдонида қийин вазифага дуч келишган. Ван Дейкнинг фикрича, агар жамоа Париждаги каби ўйин кўрсатса, турнирни тарк этиши аниқ бўлади.
У жамоасини «Энфилд»даги афсонавий оқшомлардан бирини қайтаришга чақирди.
«Бизга жуда ўзгача нарса керак, акс ҳолда имкониятимиз бўлмайди. Мухлислар ва бизнинг ўйинимиз энг муҳим омилга айланади.
Биз «Ливерпуль» эканлигимизни унутмаслигимиз ва бу оқшомни унутилмас қилишимиз шарт», — деди ҳимоячи.
Шунингдек, сардор клуб раҳбарияти ва мухлислар ўртасидаги чипталар нархи ошиши билан боғлиқ келишмовчиликларга ҳам тўхталди. У мухлисларнинг норозилик билдириш ҳуқуқини қўллаб-қувватлаб, бу муаммо тезроқ ечилиши жамоа манфаати учун хизмат қилишини билдирди.
ЙЧЛдаги баҳсдан ташқари, «Ливерпуль» Англия Премьер лигасида кучли бешликка кириш учун ҳам курашмоқда. Ҳозирда 52 очко билан бешинчи ўринда бораётган жамоани олдинда «Эвертон», «Манчестер Юнайтед» ва «Челси» каби рақибларга қарши муҳим ўйинлар кутиб турибди.
“Zamin”ни Telegram'да ўқинг!
