Ўзбекистон Суперлигасининг 10-туридан ўрин олган "Андижон" — "Динамо" Самарқанд (2:1) учрашувидан кейинги матбуот анжуманида меҳмонлар жамоаси бош мураббийи Вадим Абрамов иштирок этди ва ўйин ҳамда жамоадаги ҳолат юзасидан очиқ фикр билдирди.
Мураббий, аввало, мағлубиятга сабаб бўлган омиллар ҳақида тўхталиб, жамоа яна бир бор ўз хатолари қурбонига айланганини таъкидлади. Унинг сўзларига кўра, “Динамо” яхши ўйин намойиш этган бўлса-да, қўпол хатолар натижасида голлар ўтказиб юборган.
«Учрашув ҳақида кўп гапириш қийин. Бу ҳолат биринчи марта эмас. Биз хатолар қилаяпмиз ва шу сабаб мағлубиятга учраяпмиз», — деди Абрамов.
Мураббийнинг таъкидлашича, жамоа ҳисобни очгандан кейин ҳам устунликни сақлаб қола олмаган. Аксинча, ўйин ташаббусини рақибга бериб қўйиб, қисқа вақт ичида икки гол ўтказиб юборган.
Шунингдек, у ўйиннинг сўнгги дақиқаларида жамоа мувозанатни йўқотганини тан олди. Бу ҳолатни у жисмоний тайёргарлик ва толиқиш билан изоҳлади. Айниқса, марказий ҳимоядаги хатолар натижага салбий таъсир кўрсатган.
Майдон ҳолати ҳақидаги саволга жавоб берган мутахассис буни баҳона сифатида кўрсатмади:
«Рақиб ҳам шу майдонда ўйнади. Биз ёмон ўйнамадик, лекин хатоларга йўл қўйдик ва ютқаздик», — дея таъкидлади у.
Матбуот анжуманида жамоадаги ички муаммолар ҳам очиқ айтиб ўтилди. Абрамов айрим футболчиларнинг руҳий ҳолати яхши эмаслигини, бу эса молиявий қийинчиликлар билан боғлиқ эканини яширмади.
«Ўйинчиларни тушунаман. Узоқ вақт маош олмаслик руҳий ҳолатга таъсир қилади. Кимдир кетмоқчи, кимдир иккиланяпти», — деди у.
Мураббий айрим футболчиларнинг жамоани тарк этганини ҳам тасдиқлади. Хусусан, легионерлар ва маҳаллий ўйинчилар молиявий муаммолар сабаб кетишга қарор қилган.
Қисқаси, “Динамо”даги муаммолар фақат майдон билан чекланиб қолмаяпти. Жамоадаги ички вазият ҳам натижаларга бевосита таъсир кўрсатмоқда. Агар бу масалалар тез орада ҳал этилмаса, натижалар янада оғирлашиши мумкин.
“Zamin”ни Telegram'да ўқинг!
