Тимур Турлов шахматчи Бибисара Асаубаевани молиялаштиришдан воз кечди

Қозоғистонлик шахматчи Бибисара Асаубаеванинг онаси Лиана Танжарикова тадбиркор Тимур Турлов нима сабабдан спортчининг лойиҳасини молиялаштиришдан бош тортганини очиқлади. Танжарикованинг сўзларига кўра, у уч йил аввал Турловнинг федерация президенти этиб тайинланиши учун ташаббус кўрсатган ва шундан сўнг ҳамкорлик бўйича музокаралар бошланган. Бу ҳақда Offside.kz хабар беради.

Тадбиркор шахматчи ва унинг жамоасидан аниқ бизнес-режа ҳамда кутилаётган натижалар ҳақида ёзма таклиф сўраган. Асаубаеванинг жамоаси тўрт йиллик лойиҳани ишлаб чиқиб, унда барча молиявий мажбуриятлар ва рискларни кўрсатган.

Шунингдек, жамоа мамлакатга шахмат тожини олиб келишни ваъда қилиб, акс ҳолда барча маблағларни қайтаришга тайёрлигини билдирган.

Лиана Танжарикованинг таъкидлашича, Турлов ушбу таклифни узоқ вақт ўрганиб чиққан ва Лондон шаҳрида Бибисара билан юзма-юз учрашган. Учрашув давомида тадбиркор барча пуллар компанияга тегишли эканини ва ўзи миллиардер эмаслигини айтиб, лойиҳани молиялаштиришни рад этган.

Маълумот учун, Бибисара Асаубаева блитс бўйича уч карра жаҳон чемпиони ҳисобланади ва FIDE рейтингида еттинчи ўринни эгаллаб турибди. Forbes маълумотларига кўра, Тимур Турлов 6,3 млрд доллар бойлиги билан Қозоғистоннинг энг бадавлат кишилари рўйхатида иккинчи ўринда туради.

Янгиланиш. Эълон қилингач, манба иккинчи томон позициясини баён этувчи қўшимча материаллар чиқарди. Хусусан, Тимур Турлов ва Freedom Holding томонидан Қозоғистонда шахматни кенг кўламли қўллаб-қувватлаш (тахминан 30 млн доллар инвестиция) ҳақида хабар берилди, шунингдек Бибисара Асаубаеванинг позициясини аниқлаштирувчи изоҳлари келтирилди.