Мюнхеннинг машҳур клуби — «Бавария» сўнгги баҳсларда ҳимояда жиддий муаммоларга дуч келаётганига қарамасдан, жамоа ўзининг анъанавий, ҳужумкор ва ташаббускор ўйин услубидан воз кечиш ниятида эмас. Бу ҳақда жамоа етакчиларидан бири, тажрибали яримҳимоячи Йозуа Киммих очиқ баёнот бериб, мухлисларга муҳим сигнал юборди.
Сўнгги учта учрашувда мюнхенликлар дарвозасидан жами 11 та гол ўтказиб юборди. Германия Бундеслигасида «Майнц» ва «Хайденҳайм» каби рақиблар «Бавария»ни ҳар бири уч мартадан ранжитган бўлса, Чемпионлар лигаси ярим финалининг илк баҳсида «ПСЖ»га қарши кечган драматик ўйинда жамоа 4:5 ҳисобида мағлубиятга учради. Бу эса ҳимоя чизиғидаги камчиликлар жиддий эканини яна бир бор кўрсатди.
Шунга қарамай, Киммихнинг фикрича, бундай ҳолатлар жамоани ўз фалсафасидан воз кечишга мажбур қилмаслиги керак. Унинг таъкидлашича, «Бавария» ҳар доим ғалаба учун майдонга тушади ва ўйин услубини кескин ўзгартириш ҳақида ўйламайди:
— «Биз «ПСЖ»га қарши жавоб ўйинидан уч кун олдин бутун тизимни ўзгартиришни режалаштирмаяпмиз. Ҳимояда ёпилиб ўйнаш бизга хос эмас. Биз ғалаба қозонишимиз шарт — ҳисоб 5:4, 3:2 ёки 1:0 бўлишидан қатъи назар. Энг муҳими — натижа. Албатта, узоқ муддатли режаларда айрим жиҳатларни таҳлил қиламиз ва зарур деталларни тўғрилаймиз. Бу масала аллақачон муҳокама қилинган», — дея Киммихнинг сўзларини Bayern & Germany манбаси келтирди.
Маълумот ўрнида, «Бавария» ва «ПСЖ» ўртасидаги ҳал қилувчи жавоб учрашуви 6 май куни Мюнхен шаҳрида бўлиб ўтади. Ушбу тўқнашув нафақат финал йўлланмаси, балки жамоанинг характерини ҳам намоён этадиган ҳал қилувчи синов бўлиши кутилмоқда.
Эндиликда барча саволлар бир жавобга боғлиқ: «Бавария» ўз услубига содиқ қолган ҳолда камчиликларни енгиб ўта оладими? Мухлислар эса жавобни интиқлик билан кутмоқда.
“Zamin”ни Telegram'да ўқинг!
